എക്​സ്​റേയിലൂടെ കോവിഡ്​ കണ്ടെത്താം; എക്​സ്​റേ സേതു

രാജ്യത്തെ കോവിഡ്​ രണ്ടാം തരംഗം തുടരുന്നതിനിടെ രോഗബാധിതരെ കണ്ടെത്താൻ പുതിയ മാർഗവുമായി സ്​റ്റാർട്ട്​ അപ്​ സംരംഭം. എക്​സ്​​റേയിലൂടെ എളുപ്പത്തിൽ കോവിഡ് കണ്ടെത്താനുള്ള സംവിധാനമാണ്​ സ്​റ്റാർട്ട്​ അപ്​ സംരംഭമായ നിരാമയ്​ വികസിപ്പിച്ചെടുത്തിരിക്കുന്നത്​. ഇന്ത്യൻ ഇൻസ്​റ്റിറ്റ്യൂട്ട്​ ഓഫ്​ സയൻസ്​, ആർട്ട്​ പാർക്ക്​ എന്നിവയുടെ സഹകരണത്തോടെയാണ്​ സേവനം വികസിപ്പിച്ചെടുത്തിരിക്കുന്നത്​. ആർട്ടിഫിഷ്യൽ ഇൻറലിജൻസിന്‍റെ സഹായത്തോടെ എക്​സ്​റേകളെ പരിശോധനക്ക്​ വിധേയമാക്കി കോവിഡ്​ കണ്ടെത്തുന്ന സംവിധാനമാണിത്​.

രോഗികളുടെ എക്​സ്​റേകൾ പരിശോധിച്ച്​ ശ്വാസകോശത്തിലുണ്ടാവുന്ന പ്രശ്​നങ്ങളെ കുറിച്ച്​ എക്​സ്​​റേ സേതുവെന്ന ഈ സംവിധാനം റിപ്പോർട്ട്​ നൽകുന്നു. ഇത്​ പരിശോധിച്ച്​ രോഗിക്ക്​ കോവിഡ്​ രോഗബാധയുണ്ടോയെന്ന്​ മനസിലാക്കും. വാട്​സ്​ ആപിന്‍റെ സഹായത്തോടെയാണ്​ എക്​സ്​റേ സേതു പ്രവർത്തിക്കുന്നത്​​.

എക്​സ്​റേ സേതു ആപ്​ ഉപയോഗിക്കുന്നതിനായി www.xraysetu.com എന്ന വെബ്​സൈറ്റിലേക്ക്​ പ്രവേശിക്കുകയാണ്​ ആദ്യം വേണ്ടത്​. ഇതിന്​ ശേഷം 'ട്രൈ ദ ഫ്രീ എക്​സ്​​റേ സേതു ബീറ്റ' എന്ന ലിങ്കിൽ ക്ലിക്ക്​ ചെയ്യുക. അതിന്​ ശേഷം ലഭിക്കുന്ന വാട്​സ്​ ആപ്​ അടിസ്ഥാനമാക്കിയുള്ള ചാറ്റ്​ബോട്ട്​ സേവനം സ്​മാർട്ട്​ഫോൺ വഴിയോ വെബ്​ വഴിയോ ഉപയോഗിച്ച് എക്​സ്​റേ അപ്​ലോഡ്​ ചെയ്യാം.

അല്ലെങ്കിൽ +91 8046163838 നമ്പറിൽ ഡോക്​ടർമാർക്ക്​ മെസേജ്​ അയച്ചും സേവനം ഉപയോഗിക്കാം. ഇതിന്​ ശേഷം എക്​സ്​റേയുടെ ചിത്രങ്ങൾ അയച്ചു കൊടുത്താൽ അത്​ അടിസ്ഥാനമാക്കി എക്​സ്​റേ സേതു റിപ്പോർട്ട്​ നൽകും. ഇത്​ പരിശോധിച്ച്​ ഡോക്​ടർമാർക്ക്​ രോഗികളിലെ കോവിഡ്​ 19 കണ്ടെത്താം.​‍‍