'ഇൗ കൊടി അവർ അർഹിക്കുന്നില്ല'; സ്വാതന്ത്ര്യ ദിനത്തിൽ ബി.ജെ.പി നേതാക്കളെ ദേശീയ പതാക ഉയർത്താൻ അനുവദിക്കില്ലെന്ന്​ കർഷകർ

കാർഷിക നിയമങ്ങൾക്കെതിരേ പ്രക്ഷോഭം നടത്തുന്ന കർഷകർ സ്വാതന്ത്ര്യ ദിനത്തിൽ പ്രക്ഷോഭം ശക്​തമാക്കുമെന്ന്​ പ്രഖ്യാപിച്ചു. കർഷക യൂനിയനുകൾ സ്വാതന്ത്ര്യദിനത്തിന് മുന്നോടിയായി ബി.ജെ.പിക്ക് മുന്നറിയിപ്പും നൽകി. സ്വാതന്ത്ര്യദിനത്തിൽ ദേശീയ പതാക ഉയർത്താൻ ബിജെപി നേതാക്കളേയും മന്ത്രിമാരെയും അനുവദിക്കില്ലെന്നാണ്​ കർഷകർ പറയുന്നത്​. കൂടാതെ ഹരിയാനയിലുടനീളം വൻ പ്രതിഷേധവും സംഘടിപ്പിക്കും. ഓഗസ്റ്റ് 15 ലെ പ്രക്ഷോഭം ആസൂത്രണം ചെയ്യാൻ യോഗം ചേരാനും കർഷക യൂണിയനുകൾ തീരുമാനിച്ചിട്ടുണ്ട്​.

ഹരിയാനയിൽ ട്രാക്​ടർ പരേഡ് നടത്തുമെന്നും ബിജെപി നേതാക്കൾക്ക് കരി​​െങ്കാടി കാണിക്കുമെന്നും കർഷക നേതാവ്​ ടൈംസ് നൗ റിപ്പോർട്ടറോട്​ പറഞ്ഞു. 'അവർ ഇൗ കൊടി അർഹിക്കുന്നില്ല'-അദ്ദേഹം പറഞ്ഞു. റിപ്പബ്ലിക് ദിനത്തിൽ വൻ പ്രതിഷേധമാണ്​ രാജ്യത്ത്​ സംഘടിപ്പിക്കപ്പെട്ടത്​. കർഷകരുടെ പ്രതിഷേധത്തിനിടെ നിരവധി പേർ പോലീസുമായി ഏറ്റുമുട്ടിയിരുന്നു. ചിലർ ചെങ്കോട്ടയിൽ പ്രവേശിക്കുകയും അവിടെ പതാക ഉയർത്തുകയും ചെയ്​തു.

സ്വാതന്ത്ര്യ ദിനത്തിൽ ജന്തർമന്തറിൽ പ്രതിഷേധിക്കാൻ കർഷകരെ അനുവദിച്ചിട്ടുണ്ട്​. സംയുക്ത കിസാൻ മോർച്ച (എസ്‌കെഎം) യിൽ നിന്ന്​ 200 പേർക്കാണ്​ പ്രതിഷേധിക്കാൻ അനുമതിയുള്ളത്​. കർഷക പ്രതിഷേധത്തി​െൻറ പശ്ചാത്തലത്തിൽ തിങ്കളാഴ്​ച ആരംഭിച്ച പാർലമെൻറി​െൻറ മൺസൂൺ സെഷനിൽ ദേശീയ തലസ്ഥാനത്ത് കനത്ത സുരക്ഷയാണ്​ ഏർപ്പെടുത്തിയിട്ടുള്ളത്​. സിങ്കു, തിക്രി, ഗാസിപ്പൂർ എന്നിവിടങ്ങളിലെ ഡൽഹി അതിർത്തികൾ ഉൾപ്പെടെ പൊലീസ്​ ബന്തവസ്സിലാണ്​.