സിധു കഴിവുകെട്ടവൻ, മുഖ്യമന്ത്രിയായി അംഗീകരിക്കില്ലെന്ന്​ അമരീന്ദർ സിങ്​

ചണ്ഡിഗഡ്​: മുഖ്യമന്ത്രി സ്​ഥാനം ഒഴിഞ്ഞതിന്​ പിന്നാലെ പഞ്ചാബ്​ പി.സി.സി അധ്യക്ഷൻ നവ്​ജോത്​ സിങ്​ സിധുവിനെതിരെ പോര്​ കനപ്പിച്ച്​ അമരീന്ദർ സിങ്​. സിധു കഴിവ്​കെട്ടയാളാണെന്നും മുഖ്യമന്ത്രിയാകുന്നത്​ അംഗീകരിക്കാൻ സാധിക്കില്ലെന്നും അമരീന്ദർ പറഞ്ഞു.

'നവ്ജോത്​ സിങ്​ സിധു ഒരു കഴിവില്ലാത്ത ആളാണ്, അവൻ ഒരു ദുരന്തമാകാൻ പോകുന്നു. അടുത്ത മുഖ്യമന്ത്രിയായി അവന്‍റെ പേര് ഉയർന്നാൽ ഞാൻ എതിർക്കും. അദ്ദേഹത്തിന് പാകിസ്​താനുമായി ബന്ധമുണ്ട്. അത് രാജ്യസുരക്ഷക്ക്​ ഭീഷണിയാകും' - മുൻ മ​ുഖ്യമന്ത്രിയായ അമരീന്ദർ വാർത്ത ഏജൻസിയായ എ.എൻ.ഐയോട്​ പറഞ്ഞു.

നിയമസഭ തെരഞ്ഞെടുപ്പിന്​​ മാസങ്ങൾ മാത്രം ശേഷിക്കെ പാർട്ടിയിൽ ഉടലെടുത്ത ആഭ്യന്തര കലഹത്തെ തുടർന്നാണ്​ അമരീന്ദർ സിങ്​ ശനിയാഴ്ച രാജി വെച്ചത്​. താൻ അപമാനിക്കപ്പെട്ടുവെന്നും ഹൈക്കമാൻഡിന്​​ വിശ്വാസമുള്ള ആരെയും മുഖ്യമന്ത്രിയാക്കാമെന്നും രാജ്​ഭവന്​ പുറത്ത്​ വെച്ച്​ അമരീന്ദർ മാധ്യമപ്രവർത്തകരോട്​ പറഞ്ഞു. കോൺഗ്രസിൽ തുടരുമെന്നും അനുയായികളോട്​ ആലോചിച്ച ശേഷം ഭാവി പരിപാടികൾ തീരുമാനിക്കുമെന്നും അദ്ദേഹം പറഞ്ഞു.

ശനിയാഴ്​ച വൈകീട്ട്​ ചേർന്ന നിയമസഭ കക്ഷി യോഗത്തിന്​ പിന്നാലെയാണ്​ രാജി. പഞ്ചാബ്​ നിയമസഭ തെരഞ്ഞെടുപ്പ്​ അടുത്തതോടെയാണ് ഹൈക്കമാൻഡ്​​ അമരീന്ദറിനോട്​ മാറിനിൽക്കാൻ നിർദേശിച്ചതെന്നാണ്​​ സൂചന. അമരീന്ദറിന്‍റെ മുഖ്യമന്ത്രി സ്​ഥാനവുമായി ബന്ധപ്പെട്ട്​ 40 എം.എൽ.എമാർ ഹൈക്കമാൻഡിന്​ കത്ത്​ നൽകിയിരുന്നു. കർഷക സമരത്തിനെതിരെ അമരീന്ദർ അടുത്തിടെ നടത്തിയ വിവാദ പരാമർശങ്ങൾ ഹൈകമാൻഡിന്‍റെ അതൃപ്​തി സമ്പാദിച്ചിരുന്നു.

ഇത്രയും അപമാനങ്ങൾ സഹിച്ച് പാർട്ടിയിൽ തുടരാനാവില്ലെന്ന്​ അമരീന്ദർ കോൺഗ്രസ്​ അധ്യക്ഷ സോണിയ ഗാന്ധിയെ അറിയിച്ചിരുന്നു. 'ഇത്തരത്തിലുള്ള അപമാനം സഹിച്ച്​ മതിയായി, മൂന്നാം തവണയാണ്​ ഇത്​ സംഭവിക്കുന്നത്​. ഇത്തരം അപമാനങ്ങൾ സഹിച്ച്​ ഇനിയും പാർട്ടിയിൽ തുടരാനാകില്ല' -അമരീന്ദർ സോണിയയെ അറിയിച്ചതായി അടുത്ത വൃത്തങ്ങൾ പറയുന്നു.

നിരവധി ​എം.എൽ.എമാർ അമരീന്ദറിന്‍റെ മാറ്റം ആവശ്യപ്പെട്ട്​ നേരത്തേ തന്നെ രംഗത്തെത്തിയിരുന്നു. പുതിയ നേതൃത്വം സംസ്​ഥാനത്ത്​ വേണമെന്നാണ്​ ആവശ്യം. കൂടാതെ നവ്​ജ്യോത്​ സിങ്​ സിദ്ദുവും അമരീന്ദറിനെതിരെ പടയൊരുക്കം നടത്തിയിരുന്നു. സുനിൽ ജാക്കർ, മുൻ പഞ്ചാബ്​ കോൺഗ്രസ്​ ​തലവൻ പ്രതാപ്​ സിങ്​ ബജ്​വ, രവ്​നീത്​ സിങ്​ ബിട്ടു തുടങ്ങിയ പേരുകളാണ് പഞ്ചാബിലെ പുതിയ മുഖ്യമന്ത്രി സ്​ഥാനത്തേക്ക്​ ഉയർന്നുകേൾക്കുന്നത്​.