ബുറാരി കൂട്ടആത്മഹത്യ: ആൾദൈവം ഗീത മായെ ചോദ്യം ചെയ്​തു

ന്യൂഡൽഹി: വടക്കൻ ഡൽഹിയിലെ ബുറാരിയിൽ ഒരു കുടുംബത്തിലെ 11 പേർ കൂട്ട ആത്മഹത്യ ചെയ്​ത സംഭവത്തിൽ സ്വയം പ്രഖ്യാപിത ആൾദൈവത്തെ ഡൽഹി പൊലീസ്​ ചോദ്യം ചെയ്​തു. മരണം നടന്ന ഭാട്ടിയ കുടുംബത്തി​​​െൻറ വീടു നിർമ്മിച്ച ​കരാറുകാര​​​െൻറ മകളും ആൾദൈവവുമായ ഗീത മായെയാണ്​ പൊലീസ്​ ചോദ്യം ചെയ്​തത്​. 

ഭാട്ടിയ കുടുംബം തന്നെ കാണാൻ എത്തിയിരുന്നെന്നും താനാണ്​ അവരെ​ ആത്മഹത്യയിലേക്ക്​ തള്ളിവിട്ടതെന്നും ഗീത മാ കുറ്റസമ്മതം നടത്തുന്ന ദൃശ്യങ്ങൾ ഒരു മാധ്യമ സ്​ഥാപനംപുറത്തു വിട്ടിരുന്നു. ഇതിനു പിന്നാലെയാണ്​ പൊലീസ്​ അവരെ ചോദ്യം ചെയ്​തത്​. എന്നാൽ ആത്മഹത്യയുമായി ഗീത മായെ ബന്ധപ്പെടുത്തുന്ന തെളിവുകളൊന്നും ലഭിച്ചിട്ടില്ലെന്നാണ്​ പൊലീസ്​ പറയുന്നത്​. 

അതേ സമയം, ആത്​മഹത്യ നടന്ന വീടി​​​െൻറ ചുവരിൽ പുറത്തേക്കു തള്ളി നിൽക്കുന്ന രീതിയിൽ 11 പൈപ്പുകളും പ്രധാന കവാടത്തിലെ വാതിലിൽ 11 ദണ്ഡുകളും സ്​ഥാപിച്ചതായി പൊലീസ്​ കണ്ടെത്തിയിട്ടുണ്ട്​. ഇതിൽഏഴ്​ പൈപ്പുകൾ താഴേക്ക്​ വളഞ്ഞ നിലയിലും മറ്റു നാലെണ്ണം നേരെയുമായിരുന്നു സ്​ഥാപിച്ചത്​. മരിച്ചവരിൽ ഏഴുപേർ സ്​ത്രീകളും നാല്​ പേർ പുരുഷൻമാരുമായിരുന്നു. പൈപ്പ്​ സ്​ഥാപിച്ചതിന്​​ 11 പേരുടെ ‘ആചാര ആത്മഹത്യയുമായി’ ബന്ധമുണ്ടോ എന്ന കാര്യവും പൊലീസ്​ അന്വേഷിക്കുന്നുണ്ട്​.
 

എന്നാൽ പൈപ്പുകളും ദണ്ഡുകളും സ്​ഥാപിച്ചതിലെ സംശയം നിർമാണ കരാറുകാരനും വെൽഡറും തള്ളി. വായു സഞ്ചാരത്തിനും വെളിച്ചമെത്തുന്നതിനുമായി ചുവരിൽ പൈപ്പ്​ സ്​ഥാപിക്കണമെന്ന്​ കുടുംബാംഗം ലളിത് ചുണ്ടാവ നിർദേശിച്ചിരുന്നു. എന്നാൽ എത്ര പൈപ്പുകൾ സ്​ഥാപിക്കണമെന്ന്​ പറഞ്ഞിരുന്നില്ല. ഇതനുസരിച്ച്​ പൈപ്പ്​ സ്​ഥാപിക്കാൻ ജോലിക്കാർക്ക്​ നിർദ്ദേശം നൽകി. മാധ്യമങ്ങളിൽ വാർത്ത വന്നതോടെയാണ്​ സ്​ഥാപിച്ചത്​ 11 പൈപ്പുകളാണെന്ന കാര്യം ശ്രദ്ധയിൽപെട്ടത്​.

​ആത്മഹത്യക്ക്​ ഒരുങ്ങുന്നതിനായി അർധരാത്രി കുടുംബാംഗങ്ങൾ സ്​റ്റൂളുകൾ കൊണ്ടു വരുന്നതി​​​​​െൻറ സി.സി.ടി.വി ദൃശ്യങ്ങൾ കഴിഞ്ഞ ദിവസം പൊലീസിനു​ ലഭിച്ചിരുന്നു​. വീടിനു മുമ്പിൽ സ്​ഥാപിച്ച സി.സി.ടി.വിയിൽ പതിഞ്ഞ ദൃശ്യങ്ങളായിരുന്നു ഇത്​​. സംഭവത്തിൽ ബാഹ്യ ഇടപെടൽ ഇല്ലെന്ന നിഗമനത്തിലായിരുന്നു പൊലീസ്​. ഇതിനിടക്കാണ്​ ഗീത മായിലേക്ക്​ സംശയം നീങ്ങുന്നത്​.  
 

കൂട്ട മോക്ഷപ്രാപ്​തിക്കായി ആചാരത്തി​​​​​െൻറ ഭാഗമായാണ്​ ആത്മഹത്യ ചെയ്​തതെന്നാണ്​ പൊലീസ്​ മനസ്സിലാക്കുന്നത്​. ഇൗ സംശയത്തിന്​ ബലം പകരുന്ന വിധം നാരായൺ ദേവിയുടെ മകൻ ലളിത് ചുണ്ടാവ എഴുതിയതായി കരുതുന്ന കുറിപ്പുകൾ വീട്ടിൽ നിന്ന്​ കണ്ടെടുത്തിരുന്നു​. മരണം തങ്ങള്‍ക്ക് മോക്ഷം നല്‍കുമെന്നാണ് കുറിപ്പുകളിലുള്ളത്. ആചാരത്തിനു ശേഷം അതിശക്തരായി തിരിച്ചു വരാൻ സാധിക്കുമെന്നായിരുന്നു ലളിത് മറ്റുള്ളവരെ വിശ്വസിപ്പിച്ചത്​. 11 പേരിൽ പത്തുപേരും തൂങ്ങിയ നിലയിലും ഒരാളെ മറ്റൊരു മുറിയിൽ കഴുത്ത്​ ഞെരിച്ച്​ കൊല്ലപ്പെട്ട നിലയിലുമായിരുന്നു കണ്ടെത്തിയത്​​.