40കാരിയെ ക്ഷേത്രത്തിൽ കൂട്ടബലാത്സംഗത്തിനിരയാക്കി; രണ്ട്​ യുവാക്കൾ പിടിയിൽ

ചെന്നൈ: 40കാരിയായ വിധവയെ ക്ഷേത്രത്തിൽവെച്ച്​ കൂട്ടബലാത്സംഗത്തിനിരയാക്കിയ രണ്ട്​ യുവാക്കളെ പൊലീസ്​ അറസ്​റ്റ്​ ചെയ്​തു. നാഗപട്ടണം വണ്ടിക്കാര തെരുവിൽ അരുൾരാജ (25), ആനന്ദ്​ (22) എന്നിവരാണ്​ പ്രതികൾ.

നാഗപട്ടണം വെള്ളിപാളയം നാഗത്തോപ്പ്​ സ്വദേശിനിയായ കെട്ടിട നിർമാണ തൊഴിലാളിയാണ്​ പീഡനത്തിനിരയായത്​. രണ്ടുവർഷം മുമ്പാണ്​ ഇവരുടെ ഭർത്താവ്​ മരിച്ചത്​. വ്യാഴാഴ്​ച രാ​ത്രി സഹോദരിയുടെ വീട്ടിലേക്ക്​ നടന്നുപോകവെ ബൈക്കിലെത്തിയ പ്രതികൾ കത്തികാണിച്ച്​ ഭീഷണിപ്പെടുത്തി വായിൽ തുണി തിരുകി സമീപത്തെ പിള്ളയാർ കോവിലിലേക്ക്​ വലിച്ചിഴച്ചു കൊണ്ടുപോയി മർദിച്ച്​ അവശയാക്കിയതിനു ശേഷം പീഡിപ്പിക്കുകയായിരുന്നു. പ്രതികൾ മദ്യപിച്ചിരുന്നു.

തനിക്ക്​ രണ്ട്​ പെൺമക്കളുണ്ടെന്ന്​ കരഞ്ഞുപറഞ്ഞിട്ടും വിട്ടില്ലെന്ന്​ ഇര പൊലീസിന്​ മൊഴി നൽകി. പ്രതികൾ പിന്നീട്​ സഹോദരിയുടെ വീട്ടിൽചെന്ന്​ നടന്ന സംഭവമറിയിക്കുകയും പുറത്തുപറഞ്ഞാൽ കൊല്ലുമെന്ന്​ ഭീഷണിപ്പെടുത്തുകയും ചെയ്​തു. വെള്ളിയാഴ്​ച പുലർച്ച ദേഹമാസകലം പരിക്കുകളോടെ അവശനിലയിൽ ബോധരഹിതയായി കിടന്നിരുന്ന സ്​ത്രീയെ സമീപവാസികൾ ചേർന്ന്​ നാഗപട്ടണം ജില്ല ജനറൽ ആശുപത്രിയിലെത്തിച്ചു.

വെളിപാളയം പൊലീസ്​ കേസ്​ രജിസ്​റ്റർ ചെയ്​തു. പ്രതികൾക്കെതിരെ കർശന നടപടി എടുക്കണമെന്നവശ്യപ്പെട്ട്​ നാഗപട്ടണത്ത്​ വിവിധ മഹിള സംഘടനകൾ പ്രക്ഷോഭരംഗത്തിറങ്ങി.