വിമാനത്താവളത്തിലെ ജീവനക്കാരനെ കടിച്ച സംഭവത്തിൽ സ്ത്രീ അറസ്റ്റിൽ

ലഖ്നോ: വിമാനത്താവളത്തിലെ ജീവനക്കാരനെ കടിച്ച സംഭവത്തിൽ സ്ത്രീ അറസ്റ്റിൽ. ലഖ്നോ വിമാനത്താവളത്തിൽവെച്ച് ഗ്രൗണ്ട് സ്റ്റാഫിനെ ആക്രമിച്ച സംഭവത്തിലാണ് ഒരാൾ പിടിയിലായത്. ചൊവ്വാഴ്ച വൈകുന്നേരം അഞ്ചരയോടെയാണ് ഗ്രൗണ്ട് സ്റ്റാഫിന് നേരെ ആക്രമണമുണ്ടായത്. സരോജിനി നഗർ പൊലീസ് സ്റ്റേഷനിലാണ് ഇവർക്കെതിരെ കേസെടുത്തത്.

വിമാനത്തിൽ കയറിയതിന്​ ശേഷം സഹയാത്രികനുമായി ഇവർ തർക്കത്തിലേർപ്പെട്ടു. വിമാനത്തിൽ നിന്നും ഇറങ്ങാൻ ജീവനക്കാർ ആവശ്യപ്പെട്ടുവെങ്കിലും അവർ അതിന് തയാറായില്ല. തുടർന്ന് ഗ്രൗണ്ട് സ്റ്റാ​ഫെത്തി യാത്രക്കാരിയെ പുറത്തിറക്കാൻ ശ്രമിക്കുന്നതിനിടെ ഇവർ ജീവനക്കാരനെ കടിക്കുകയായിരുന്നു.

പിന്നീട് സി.ഐ.എസ്.എഫ് എത്തി യാത്രക്കാരിയെ കസ്റ്റഡിയിലെടുത്ത് തുടർനടപടികൾക്കായി ​പൊലീസിന് കൈമാറി. ഐ.പി.സി 324 പ്രകാരമാണ് ഇവർക്കെതിരെ കേസെടുത്തിരിക്കുന്നതെന്ന് ​പൊലീസ് അറിയിച്ചു. ആഗ്രയിൽ നിന്നും സഹോദരിയെ കാണുന്നതിന് വേണ്ടിയാണ് ഇവർ ലഖ്നോവിൽ എത്തിയത്. കേസെടുത്തതിന് ശേഷം പിന്നീട് ഇവരെ ജാമ്യത്തിൽ വിടുകയായിരുന്നുവെന്നും പൊലീസ് അറിയിച്ചു.