ഉദ്യോഗസ്ഥയെ വലിച്ചിഴച്ച് കല്ലെറിഞ്ഞ് മണൽ മാഫിയയുടെ ആക്രമണം; ഞെട്ടിക്കുന്ന ദൃശ്യം പുറത്ത്, 44 പേർ അറസ്റ്റിൽ

പട്ന: ബിഹാറിലെ പട്നയിൽ മൈനിങ് വകുപ്പിലെ ഉദ്യോഗസ്ഥ മണൽ മാഫിയയുടെ ആക്രമണത്തിനിരയായി. ‍ഉദ്യോഗസ്ഥയെ വലിച്ചിഴച്ച് ആക്രമിക്കുന്ന ദൃശ്യം പുറത്തായി. സംഭവത്തിൽ 44 പേർ അറസ്റ്റിലായിട്ടുണ്ട്.

ബിഹ്ത നഗരത്തിലാണ് സംഭവം. പരിശോധനക്കെത്തിയ ഉദ്യോഗസ്ഥയെ ആക്രമിക്കുകയായിരുന്നു. 10 - 15 പേരെയെങ്കിലും പുറത്തുവന്ന വീഡിയോയിൽ കാണാം. അസഭ്യം പറഞ്ഞും കല്ലെറിഞ്ഞുമായിരുന്നു ആക്രമണം.

പ്രദേശത്ത് മണൽ ഖനനവുമായി ബന്ധപ്പെട്ട പരിശോധനക്കിടെ ഒരു സംഘം സാമൂഹിക വിരുദ്ധർ ജില്ലാ മൈനിങ് ഓഫീസറെ ആക്രമിക്കുകയായിരുന്നു. മൂന്ന് ഉദ്യോഗസ്ഥർക്ക് പരിക്കേറ്റിട്ടുമുണ്ട് -പാട്‌ന വെസ്റ്റ് എസ്.പി രാജേഷ് കുമാർ പറഞ്ഞു.

സംഭവത്തിൽ 44 പേരെ അറസ്റ്റ് ചെയ്തതായും മൂന്ന് എഫ്‌.ഐ.ആറുകൾ ഫയൽ ചെയ്തതായും പൊലീസ് അറിയിച്ചു. കൂടുതൽ പേരെ പിടികൂടാനായി റെയ്ഡുകൾ തുടരുകയാണ്.