ഉത്തർപ്രദേശിൽ യുവതിയെയും ഭിന്നശേഷിക്കാരനെയും മർദിച്ച്,​ തലമുണ്ഡനം ചെയ്​ത്​ ചെരിപ്പ്​ മാലയിട്ട്​ നടത്തിച്ചു

ലഖ്​നോ: ഉത്തർപ്രദേശിലെ കനൗജിൽ യുവതിയെയും ഭിന്നശേഷിക്കാരനെയും സദാചാരഗുണ്ടകൾ മർദിച്ച്​ അവശരാക്കി ചെരുപ്പ്​ മാലയിട്ട്​ തെരുവിലൂടെ നടത്തിച്ചു. ഇരുവരുടെയും തല മുണ്ഡനം ചെയ്​ത്​, മുഖത്ത്​ കാരി വാരിതേച്ച്​്​, ചെരുപ്പ്​ മാലയണിയിച്ച്​ തെരുവിലൂടെ നടത്തിക്കുന്ന ദൃശ്യങ്ങൾ സോഷ്യൽമീഡിയയിൽ പ്രചരിപ്പിക്കുകയും ചെയ്​തു.

തലസ്ഥാന നഗരമായ ലഖ്‌നോവിൽ നിന്ന് 122 കിലോമീറ്റർ അകലെയുള്ള ഗ്രാമത്തിൽ ബുധനാഴ്ചയാണ്​ സംഭവം​. യുവതിയുടെ ബന്ധുക്കൾ ഉൾപ്പെടെയുള്ളവരാണ്​ അക്രമത്തിന്​ പിന്നിലെന്ന്​ അവർ ആരോപിച്ചു. സംഭവത്തിൽ പൊലീസ്​ രണ്ട്​ പേരെ അറസ്​റ്റു ചെയ്​തു.

37കാരിയായ യുവതിയുടെ ഭർത്താവ് രണ്ട് മാസം മുമ്പ് ആത്മഹത്യ ചെയ്തിരുന്നു. പിന്നീട്​ ഇവരെ സഹായിച്ചിരുന്നത്​ ഭിന്നശേഷിയുള്ള 40കാരനായിരുന്നു. യുവതിയുടെ ബന്ധുക്കൾക്ക് ഇവരുടെ സൗഹൃദം വിലക്കിയിരുന്നു. വീണ്ടും ഇവരെ ഗ്രാമത്തിൽ ഒരുമിച്ചു കണ്ടതോടെ ​ ബന്ധുക്കളും നാട്ടുകാരും ചേർന്ന്​ ആക്രമിക്കുകയായിരുന്നു.

യുവതിയുടെ ബന്ധുക്കൾ ഭിന്നശേഷിക്കാരനെ മർദിച്ച്​ അവശനാക്കിയിരുന്നു. ബലം പ്രയോഗിച്ച്​ ഇരുവരുടെ തല മുണ്ഡനം ചെയ്യുകയും മുഖത്ത്​ കരിതേപ്പിച്ച്​ ​ചെരുപ്പ്​ മാലയിട്ട്​ നടത്തുകയുമായിരുന്നു. സോഷ്യൽ മീഡയയിൽ പ്രചരിക്കുന്ന വിഡിയോയിൽ പരിക്കേറ്റ ഭിന്നശേഷിക്കാരൻ വടി ഉപയോഗിച്ച്​ നടക്കുന്നതും കാണാം.

യുവതിയുടെ പരാതിയിൽ ​എട്ടു പേർക്കെതിരെയാണ്​ കേസ്​ എടുത്തിരിക്കുന്നത്​. ഇതിൽ യുവതിയുടെ ബന്ധുക്കളായ രണ്ട്​ പേർ അറസ്​റ്റിലായെന്നും മറ്റുള്ളവർക്ക്​ വേണ്ടിയുള്ള തെരച്ചിൽ ഊർജിതപ്പെടുത്തിയതായും പൊലീസ്​ പറഞ്ഞു.