കാമുകനെ യുവതി തോക്ക്​ ചൂണ്ടി വിവാഹവേദിയിൽ നിന്ന്​ തട്ടികൊണ്ടുപോയി

ബുന്ദേൽഖന്ദ്​: പ്രണയം നിരാകരിച്ച്​ മറ്റൊരു വിവാഹത്തിനൊരുങ്ങിയ കാമുകനെ യുവതി തോക്കു ചൂണ്ടി ഭീഷണിപ്പെടുത്തി കല്ല്യാണ പന്തലിൽ നിന്ന്​ തട്ടികൊണ്ടുപോയി. ഉത്തർപ്രദേശിലെ ബുന്ദേൽഖന്ദിൽ ചൊവ്വാഴ്​ച രാത്രിയാണ്​ സംഭവം.

വിവാഹ ചടങ്ങു നടക്കുന്ന വേദിയിലേക്ക്​ എസ്​.യു.വി കാറിൽ വന്നിറങ്ങിയ യുവതി വരനെ തോക്ക്​ ചൂണ്ടി നിർത്തി സിനിമാ സ്​റ്റെയിലിൽ തട്ടികൊണ്ടുപോവുകയായിരുന്നു.  ‘‘ഇയാൾ എന്നെയാണ്​ പ്രണയിച്ചിരുന്നത്​. മ​റ്റൊരു വിവാഹം കഴിക്കുന്നതിന്​ വേണ്ടി എന്നെ  ചതിക്കുകയായിരുന്നു. അത്​ നടത്താൻ ഞാൻ സമ്മതിക്കില്ല’’– വര​​െൻറ തലയിലേക്ക്​ തോക്കു ചൂണ്ടി യുവതി പറഞ്ഞു. രണ്ടു ചെറുപ്പക്കാർക്കൊപ്പമാണ്​ 25 കാരിയായ യുവതി വിവാഹ മണ്ഡപത്തിലെത്തിയത്​. തോക്കു ചൂണ്ടി ബന്ധുക്കളെ വിരട്ടിയ സംഘം വരനെ തട്ടിക്കൊണ്ടുപോയി.

അശോക്​ യാദവ്​ എന്ന യുവാവിനെയാണ്​ കാമുകിയും സംഘവും തട്ടികൊണ്ടുപോയത്​. അശോക്​ യാദവ്​ മാസങ്ങൾക്ക്​ മുമ്പ്​ കാമുകിയെ രഹസ്യമായി വിവാഹം കഴിച്ചിരുന്നു. കുടുംബത്തി​​െൻറ സമ്മർദ്ദത്തെ തുടർന്ന്​ ആ ബന്ധം ഉപേക്ഷിച്ച്​ മറ്റൊരു വിവാഹത്തിന്​ ഒരുങ്ങുകയായിരുന്നുവെന്നും ​അയൽവാസികൾ പൊലീസിനെ അറിയിച്ചു.
 ജോലി സംബന്ധമായി പട്ടണത്തിലാണ്​  മകൻ അശോക്​ താമസിച്ചിരുന്നതെന്നും അതിനാൽ പ്രണയത്തെ കുറിച്ചോ വിവാഹത്തെ കുറിച്ചോ അറിഞ്ഞിരുന്നില്ലെന്നും പിതാവ്​ രാംഹത്​ യാദവ്​ പറഞ്ഞു.
അതേസമയം, വിവാഹം മുടങ്ങിയത്​ ഭാഗ്യമായാണ്​ കാണുന്നതെന്നായിരുന്നു​ വധുവി​​െൻറ പ്രതികരണം. വരനെ തട്ടികൊണ്ടുപോയെന്ന രക്ഷിതാക്കളുടെ പരാതിയിൽ പൊലീസ്​ കേസെടുത്തിട്ടുണ്ട്​.