കോൺഗ്രസ്​ എം.എൽ.എക്കെതിരെ ലൈംഗികാരോപണ ഭീഷണി: യുവതി പിടിയിൽ

ഭോപ്പാൽ: മധ്യപ്രദേശിൽ കോൺഗ്രസ്​ എം.എൽ.എക്കെതിരെ വ്യാജ ലൈംഗികാ​േരാപണം നടത്തിയ യുവതി പിടിയിൽ. ഭിണ്ഡ് ജില്ലയിലെ എം.എൽ.എ ഹേമന്ത്​ കട്ടാരെയുടെ പരാതിയിൽ യുവതിയെ പൊലീസ്​ അറസ്​റ്റു ചെയ്​തു ജാമ്യത്തിൽ വിട്ടയക്കുകയായിരുന്നു. 

ജേർണലിസം വിദ്യാർഥിയായ യുവതി തനിക്കെതിരെ ലൈംഗികാരോപണം ഉന്നയിച്ച്​ അഞ്ചു ലക്ഷം രൂപ തട്ടിയെന്ന്​ കട്ടാരെ പൊലീസിൽ പരാതിപ്പെടുകയായിരുന്നു. രണ്ടു കോടി രൂപ നൽകിയില്ലെങ്കിൽ എം.എൽ.എക്കെതിരെ ബലാത്സംഗത്തിന്​ കേസ്​ നൽകുമെന്ന്​ യുവതി ഭീഷണിപ്പെടുത്തിയതായും കട്ടാരെ പരാതിയിൽ ചൂണ്ടികാണിച്ചിരുന്നു. 

അതേസമയം, ‘യൂത്ത്​ മഞ്ച്​ ആസാദി’ എന്ന വിദ്യാർഥി സംഘടനയുമായി ബന്ധപ്പെട്ട്​ പരിചയമുള്ള തന്നെ എം.എൽ.എ ജിമ്മിലേക്ക്​ വിളിച്ച്​ ലൈംഗികപീഡനത്തിനിരയാക്കിയെന്നും ദൃശ്യങ്ങൾ പകർത്തിയെന്നും യുവതി നേരത്തെ പരാതിപ്പെട്ടിരുന്നു.  ചിത്രങ്ങളും വിഡിയോ ദൃശ്യവും പുറത്തുവിടുമെന്ന്​ ഭീഷണിപ്പെടുത്തിയെന്നും കട്ടാരയെ താൻ ഭീഷണിപ്പെടുത്തി പണം പറ്റിയെന്ന്​ പൊലീസിൽ വ്യാജപരാതി നൽകിയെന്നും യുവതി ആരോപിച്ചു. 

യുവതി നൽകിയ പരാതിയിൽ പൊലീസ്​ എം.എല്‍.എ.ക്കെതിരേയും കേസെടുത്തിട്ടുണ്ട്​. സംഭവത്തിൽ അന്വേഷണം നടത്തുന്നതിന്​ ഡി.​െഎ.ജിയുടെ നിർദേശപ്രകാരം രണ്ട്​ എ.എസ്​.പിമാരും രണ്ട്​ എസ്​.പിമാരുമുൾപ്പെ​ട്ട പ്രത്യേക അന്വേഷണ സംഘത്തെ നിയോഗിച്ചിട്ടുണ്ട്​.