മൊബൈൽ ഫോണും ഇൻറർനെറ്റുമില്ല; വാക്​സിനായി രജിസ്​ട്രേഷൻ നടത്താനാവാതെ യു.പിയിലെ ഗ്രാമങ്ങൾ

ലഖ്​നോ: ഇന്ത്യയിൽ 18 വയസിന്​ മുകളിലുള്ളവർക്ക് കോവിഡ്​​ വാക്​സിനേഷൻ പ്രവർത്തനങ്ങൾ ആരംഭിച്ചിട്ട്​ ദിവസങ്ങളായി. വാക്​സിൻ ലഭിക്കുന്നതിനായി കോവിൻ വെബ്​സൈറ്റ്​, ആരോഗ്യസേതു ആപ്​ അല്ലെങ്കിൽ ഉമങ്​ ആപ്​ വഴി രജിസ്​റ്റർ ചെയ്യണം. നേരിട്ട്​ പോയി വാക്​സിനെടുക്കാൻ കഴിയുന്ന സാഹചര്യം നിലവിലില്ല. ഇത്​ ഇന്ത്യയിലെ ഗ്രാമങ്ങളെ വലിയ പ്രതിസന്ധിയിലേക്ക്​ തള്ളിവിടുന്നുവെന്നാണ്​ റിപ്പോർട്ടുകൾ. മൊബൈൽ ഫോണും ഇൻറർനെറ്റും ഇല്ലാത്തതിനാൽ യു.പിയിലെ ഗ്രാമങ്ങളിലുള്ളവർക്ക്​ വാക്​സിനായി ഇനിയും രജിസ്​റ്റർ ചെയ്യാൻ സാധിച്ചിട്ടില്ലെന്നാണ്​ ഇന്ത്യ ടുഡേ റിപ്പോർട്ട്​ ചെയ്യുന്നത്​.

വാരണാസിയിലെ ഉൾപ്രദേശങ്ങളിലുള്ള ഗ്രാമങ്ങളിലെ സ്ഥിതിയാണ്​ ഇന്ത്യ ടുഡേ റിപ്പോർട്ടിലുള്ളത്​. മൊബൈൽ​ ഫോണും ഇൻറർനെറ്റും കാര്യമായി ലഭ്യമല്ലാത്ത ഇവിടെ ഭൂരിപക്ഷം ആളുകളും വാക്​സിനായി രജിസ്​റ്റർ ചെയ്​തിട്ടില്ല. വാക്​സിനായി എങ്ങനെ രജിസ്​റ്റർ ചെയ്യണമെന്നതിനെ കുറിച്ച്​ അറിവില്ലാത്തതും യു.പിയിലെ ഗ്രാമങ്ങളിൽ പ്രശ്​നമാവുന്നുണ്ട്​.

യു.പിയിലെ ഉൾനാടൻ ഗ്രാമങ്ങളിലെ ജനങ്ങളിൽ ഭൂരിപക്ഷം പേർക്കും സ്​മാർട്ട്​ഫോണില്ല. ബേസിക്​ ഫോണുകളാണ്​ ഇവരുടെ കൈവശമുള്ളത്​. ഇതിനും സിഗ്​നൽ ലഭിക്കാത്ത അവസ്ഥയുണ്ട്​. ഇലക്​ട്രിസിറ്റി തന്നെ ഈയടുത്താണ്​ ഇത്തരം ഗ്രാമങ്ങളിലേക്ക്​ എത്തിയത്​. രാജ്യത്ത്​ കോവിഡ്​ രണ്ടാം തരംഗം ഗ്രാമങ്ങളേയും ഗുരുതരമായി ബാധിക്കുന്നതിനിടെ എത്രയും പെ​ട്ടെന്ന് യു.പി അടക്കമുള്ള സംസ്ഥാനങ്ങളിലെ​ ഗ്രാമീണമേഖലയിലുള്ളവർക്ക്​ വാക്​സിൻ ഉറപ്പാക്കാനുള്ള നടപടികൾ സ്വീകരിക്കണമെന്ന ആവശ്യമാണ്​ ഉയരുന്നത്​.