പ്രധാനമന്ത്രിയുടെ പദവിയെ മാനിക്കും, കർഷകരുടെ ആത്മാഭിമാനം സംരക്ഷിക്കുകയും ചെയ്യും -നരേഷ്​ തികെയ്​ത്​​

ന്യൂഡൽഹി: കർഷക പ്രക്ഷോഭകർ പ്രധാനമന്ത്രി നരേന്ദ്രമോദിയുടെ പദവിയെ മാനിക്കുമെന്നും അതേസമയം പ്രതിഷേധിക്കുന്ന കർഷകരുടെ ആത്മാഭിമാനം സംരക്ഷിക്കാൻ ബാധ്യതയുണ്ടെന്നും​ ഭാരത്​ കിസാൻ യൂനിയൻ (ബി.കെ.യു) നേതാവ്​ നരേഷ്​ തികെയ്​ത്​​​. താൻ കർഷകരുമായി സംസാരിക്കാൻ ഒരു ഫോൺകോൾ അകലെയു​ണ്ടെന്ന്​ നരേന്ദ്രമോദി പറഞ്ഞതി​െൻറ​ തൊട്ടടുത്ത ദിവസമാണ്​ നരേഷ്​ തികെയ്​ത്​​ ​ഇങ്ങനെ അഭിപ്രായപ്പെട്ടത്​.

തങ്ങളുടെ പ്രവർത്തകരെ സർക്കാർ വിട്ടയക്കണമെന്നും ചർച്ചക്കുള്ള സാഹചര്യം ഒരുക്കണമെന്നും മാന്യമായ പരിഹാരത്തിലേക്കെത്തണമെന്നും തികെയ്​ത്​​ പറഞ്ഞു.

''സമ്മർദ്ദത്തിന്​ വഴങ്ങി ഞങ്ങൾ ഒന്നും അംഗീകരിക്കില്ല. ​പ്രധാനമന്ത്രിയുടെ പദവിയെ ഞങ്ങൾ മാനിക്കുന്നു. സർക്കാറോ പാർലമെ​േൻറാ അവർക്ക്​ മുമ്പിൽ തല കുനിക്കണമെന്ന്​ കർഷകർ ആഗ്രഹിക്കുന്നില്ല. കർഷകരുടെ ആത്മാഭിമാനം സംരക്ഷിക്കപ്പെടുന്നുണ്ടെന്ന്​ ഞങ്ങൾ ഉറപ്പാക്കും. ഇതിനിടയിലെ വഴി കണ്ടെത്തണം. ചർച്ച നടക്കണം.'' -അദ്ദേഹം പറഞ്ഞു.

റിപ്പബ്ലിക്​ ദിനത്തിലെ കർഷക റാലിയിൽ നടന്ന അക്രമ സംഭവങ്ങൾ ഗൂഢാലോചനയുടെ ഭാഗമാണെന്ന്​ തികെയ്​ത്​​ ആരോപിച്ചു. ''ദേശീയ പതാകയാണ്​ എല്ലാത്തിനും മുകളിൽ. ദേശീയ പതാകയോട്​ അനാദരവ് കാണിക്കാൻ ആരെയും അനുവദിക്കില്ല. അത്​ സഹിക്കാൻ സാധിക്കില്ല.'' -അദ്ദേഹം പറഞ്ഞു.

അതേസമയം, സമ്മർദ്ദത്തിലാക്കിക്കൊണ്ട്​ ഒരു ഉടമ്പടിയും ഉണ്ടാവില്ലെന്നും ചർച്ച നടക്കുമെന്നും ഭാരത്​ കിസാൻ യൂനിയൻ നേതാവായ രാകേഷ്​ തികെയ്​ത്​ പറഞ്ഞു.

''സമ്മർദ്ദത്തിലായിക്കൊണ്ട്​ യാതൊരു ഉടമ്പടിയും ഉണ്ടാവില്ല. ഇൗ വിഷയത്തിൽ ഞങ്ങൾ ചർച്ച നടത്തും. പ്രധാനമന്ത്രി ഞങ്ങളുടേതു കൂടിയാണ്​. അദ്ദേഹം മുൻകൈയെടുക്കുന്നതിൽ ഞങ്ങൾ നന്ദിയുള്ളവരാണ്​. ഞങ്ങൾ അതിനെ മാനിക്കും. ഞങ്ങൾക്ക്​ ഞങ്ങളു​ടെ ആളുകൾ​ മോചിപ്പിക്കപ്പെടേണ്ടതുണ്ട്​.'' -രാകേഷ്​​ തികെയ്​ത്​​​ കൂട്ടിച്ചേർത്തു.

കർഷക റാലിയിലെ അക്രമ സംഭവങ്ങളുമായി ബന്ധപ്പെട്ട്​ 40 കേസുകളാണ്​ ഡൽഹി പൊലീസ്​ രജിസ്​റ്റർ ചെയ്​തത്​. 80 പേരെ അറസ്​റ്റ്​ ചെയ്യുകയും ചെയ്​തു.