മലയാളി റൈഡറുടെ ദുരൂഹമരണം കൊലപാതകമെന്ന്​ രാജസ്ഥാൻ പൊലീസ്​; ഭാര്യയും സുഹൃത്തുകളും അറസ്റ്റിൽ

ജയ്​പൂർ: 34കാരനായ മലയാളി ബൈക്ക്​ റൈഡറുടെ ദുരൂഹ മരണത്തിൽ വർഷങ്ങൾക്ക്​ ശേഷം വഴിത്തിരിവ്​. ജയ്​സാൽമീറിലെ ഇന്ത്യ-ബാജ മോ​ട്ടോർസ്​പോട്​സ്​ റാലിക്ക്​ മുന്നോടിയായുള്ള പരിശീലനത്തിനിടെയായിരുന്നു മലയാളി റൈഡറായ അസ്​ബാക്ക്​ മോന്‍റെ മരണം. ഇത്​ കൊലപാതകമാണെന്നാണ്​ രാജസ്ഥാൻ പൊലീസിന്‍റെ അന്വേഷണത്തിൽ തെളിഞ്ഞത്​​.

കേസുമായി ബന്ധപ്പെട്ട്​ ഇയാളുടെ ഭാര്യയും രണ്ട്​ സുഹൃത്തുക്കളും ബംഗളൂരുവിൽ നിന്നും അറസ്റ്റിലായി​. ഭാര്യ സുമേര പർവേസും സുഹൃത്തുകളായ സഞ്​ജയ്​, വിശ്വാസ്​ എന്നിവരാണ്​​ അറസ്റ്റിലായത്​. കൂടുതൽ അറസ്റ്റ്​ വൈകാതെയുണ്ടാവുമെന്ന്​ പൊലീസ്​ അറിയിച്ചു.

2018 ആഗസ്റ്റ്​ 16നാണ്​ അസ്​ബാക്ക്​ മരണപ്പെട്ടത്​. മരുഭൂമിയിൽ ബൈക്കോടിക്കുന്നതിനിടെ ശാരീരിക അസ്വസ്ഥതകളുണ്ടായെന്നും തുടർന്ന്​ മരണം സംഭവിച്ചുമെന്നുമായിരുന്നു ഭാര്യയും സുഹൃത്തുക്കളും പറഞ്ഞത്​. ഇവരുടെ മൊഴി മുഖവിലക്കെടുത്ത്​ പൊലീസ്​ കേസ് അന്വേഷണം​ അവസാനിപ്പിച്ചു.

പിന്നീട്​ ജയ്​സാൽമീർ പൊലീസ്​ സുപ്രണ്ട്​ അജയ്​ സിങ്​ പഴയ കേസ്​ ഫയലുകൾ നോക്കുന്നതിനിടെ ഈ കേസിൽ ചില പ്രശ്​നങ്ങളുണ്ടെന്ന്​ കണ്ടെത്തി. മൃതദേഹത്തിൽ പരിക്കേറ്റതിന്‍റെ പാടുകൾ ഉണ്ടായിരുന്നത്​ പൊലീസിന്‍റെ സംശയം ബലപ്പെടുത്തി. ബൈക്കറുടെ ഭാര്യയുടേയും സുഹൃത്തുക്കളുടേയും ഫോൺ റെക്കോർഡുകൾ പരിശോധിച്ചപ്പോൾ സംശയാസ്​പദമായ പലതും കണ്ടെത്താൻ കഴിഞ്ഞു. തുടർന്നാണ്​ കേസിൽ രാജസ്ഥാൻ പൊലീസ്​ പുനരന്വേഷണം നടത്താൻ തീരുമാനിച്ചത്​. കേസിൽ 2020 ഡിസംബറിൽ പുനരന്വേഷണം ആരംഭിച്ചത്​.