രണ്ട്​ ദിവസത്തേക്ക്​ തിരക്കിലായിരിക്കും; തലേദിവസം ഭാര്യയോട്​​ സന്തോഷ്​ ബാബു പറഞ്ഞു​

ന്യൂഡൽഹി: തിങ്കളാഴ്​ച രാത്രിയായിരുന്നു ലഡാക്കിലെ ഗാൽവാൻ താഴ്​വരയിൽ ചൈനീസ് സൈന്യവുമായുള്ള ഏറ്റുമുട്ടലിൽ കേണൽ സന്തോഷ് ബാബു കൊല്ലപ്പെടുന്നത്​. തലേദിവസം അദ്ദേഹം ഭാര്യ സന്തോഷിയുമായി ഫോണിൽ സംസാരിച്ചിരുന്നു. ‘ഇനിയുള്ള രണ്ട്​ ദിവസങ്ങൾ വളരെ തിരക്കുള്ളതായിരിക്കുമെന്നാണ്​ അദ്ദേഹം പറഞ്ഞതെന്ന്​ ഭാര്യ ഒാർത്തെടുത്തു. ലഡാക്കിലെ ചൈന അതിർത്തിയിൽ നിലനിൽക്കുന്ന പിരിമുറക്കവുമായി ബന്ധപ്പെട്ടാണ്​ അദ്ദേഹം സഹധർമിണിക്ക്​ സന്ദേശം നൽകിയത്​​. രണ്ട്​ മാസം കൊണ്ട്​ എല്ലാം ശാന്തമാകുമെന്നും എല്ലാവരും ശക്​തരായിരിക്കണമെന്നും സന്തോഷ്​ ബാബു അറിയിച്ചിരുന്നു. 

എന്നാൽ തിങ്കളാഴ്​ച രാത്രി പ്രിയ ഭർത്താവ്​ വീരചരമം പ്രാപിച്ച വാർത്തയായിരുന്നു സന്തോഷിയെയും രണ്ട്​ മക്കളെയും കാത്തിരുന്നത്​. അന്ന്​ പുലർച്ചെ ചൈനീസ്​ സൈന്യവുമായി കേണൽ പ്രശ്​ന പരിഹാരത്തിന്​ വേണ്ടിയുള്ള ചർച്ചകൾ നടത്തിയിരുന്നു. ചൈനയുമായുള്ള അതിർത്തി പ്രശ്​നത്തിൽ ഇന്ത്യക്ക്​ 20 ജവാൻമാരുടെ ജീവനാണ്​ നഷ്​ടമായത്​. 

‘അദ്ദേഹത്തിനായിരുന്നു ആ മേഖലയുടെ ചുമതല. ത​​െൻറ കീഴിലുള്ളവരെ സംരക്ഷിക്കേണ്ടത്​ ത​​െൻറ ഉത്തരവാദിത്തമാണ്​. വെറും രണ്ട്​ മാസത്തെ കാര്യമാണെന്നും ക്ഷമയോടെ കാത്തിരിക്കാനും’ അദ്ദേഹം എന്നോട്​ പറഞ്ഞിരുന്നു. സൈനിക സേവനത്തിലേക്ക്​ കടന്നതിന്​ ശേഷം ഇതുവരെ എന്താണ്​ അദ്ദേഹത്തെ തിരക്കിലാക്കുന്നതെന്ന്​ ഞങ്ങളോട്​ പറഞ്ഞിട്ടില്ല. എന്നാൽ അന്ന്​ ഫോൺ വിളിച്ച്​ രണ്ട്​ ദിവസത്തേക്ക്​ തിരക്കിലായിരിക്കും എന്ന്​ പറഞ്ഞതിലൂടെ ഞങ്ങൾ മനസിലാക്കണമായിരുന്നു അദ്ദേഹം കടന്നുപോകുന്നത്​ വളരെ അപകടകരമായ സാഹചര്യത്തിലൂടെയാണെന്ന്​..

അവസാനം വിളിച്ച ഫോൺ കോളുക​ളിലെല്ലാം തന്നെ ത​​െൻറ സഹോദരിയോട്​ അന്വേഷണം അറിയിക്കണമെന്ന്​ അദ്ദേഹം നിരന്തരം ഒാർമപ്പെടുത്തിയിരുന്നു. അവളെ വിളിക്കാൻ ത​​െൻറ തിരക്കുകൾ അനുവദിക്കുന്നില്ല എന്നും പറഞ്ഞിരുന്നു. ഞങ്ങൾ വിഡിയോ കോളിലൂടെ സംസാരിച്ചിരുന്നതായി ഞാൻ അദ്ദേഹത്തെ അറിയിച്ചു. പത്ത്​ വർഷത്തിന്​ മുമ്പാണ്​ സന്തോഷ്​ ബാബുവി​​െൻറ ജീവിതത്തിലേക്ക്​ സന്തോഷി എത്തുന്നത്​. ത​​െൻറ ധൈര്യശാലിയായ ഭർത്താവിനെയോർത്ത്​ അഭിമാനമുണ്ടെന്ന്​ അവർ പറഞ്ഞു. നാല്​ വയസുകാരനായ മകനും ഒമ്പത്​ വയസുകാരിയായ മകളും കൂടിയുണ്ട്​ സന്തോഷ്​ ബാബുവിന്​. 10 വർഷത്തെ ദാമ്പത്യ ജീവിതത്തിൽ സന്തോഷിക്ക്​ പ്രിയതമ​​െൻറ കൂടെ ചിലവഴിക്കാൻ കഴിഞ്ഞത്​ വെറും അഞ്ച്​ വർഷം മാത്രമായിരുന്നു.