രാമജന്മഭൂമി പ്രസ്ഥാനത്തോടുള്ള പ്രതിബദ്ധത വ്യക്തമാക്കുന്ന വിധിയെന്ന്​ അദ്വാനി; ചരിത്രപരമെന്ന്​ മുരളി മനോഹർ ജോഷി

ന്യൂഡൽഹി: ബാബരി മസ്​ജിദ്​ തകർത്ത കേസിൽ എല്ലാ പ്രതികളെയും കുറ്റവിമുക്തരാക്കിയ സി.ബി.ഐ പ്രത്യേക കോടതി വിധി പൂർണ്ണഹൃദയത്തോടെ സ്വാഗതം ചെയ്യുന്നുവെന്ന്​ മുതിർന്ന ബി.ജെ.പി നേതാവും കേസിലെ പ്രതിയുമായിരുന്ന എൽ.കെ അദ്വാനി. രാം ജന്മഭൂമി പ്രസ്ഥാനത്തോടുള്ള വ്യക്തിപരമായ പ്രതിബദ്ധതയും ബി.ജെ.പിയുടെ വിശ്വാസവുമാണ്​ ഈ വിധി വ്യക്തമാക്കുന്നതെന്ന്​ എൽ.കെ അദ്വാനി പ്രതികരിച്ചു.

കോടതി വിധി ചരിത്രപരമായ തീരുമാനമാണെന്ന്​ കേസിൽ പ്രതിചേർക്കപ്പെട്ടിരുന്ന നേതാവ്​ മുരളി മനോഹർ ജോഷി പ്രതികരിച്ചു. ഡിസംബർ ആറിന്​ അയോധ്യയിൽ നടന്ന സംഭവത്തിൽ ഗൂഢാലോചന നടന്നിട്ടില്ലെന്ന് ഇൗ വിധി തെളിയിക്കുന്നു. ബി.ജെ.പിയുടെ പരിപാടികളും റാലികളും ഒരു ഗൂഢാലോചനയുടെയും ഭാഗമല്ല. വിധിയിൽ സന്തോഷമുണ്ട്​. അയോധ്യയിൽ രാമക്ഷേത്രം ഉയരുന്നതിൽ എല്ലാവരും ആവേശഭരിതരാണെന്നും മുരളി മനോഹർ ജോഷി കൂട്ടിച്ചേർത്തു.

വൈകിയാണെങ്കിലും നീതി വിജയിക്കുമെന്നാണ്​ പ്രതിരോധ മന്ത്രി രാജ്​നാഥ്​ സിങ്​ പ്രതികരിച്ചത്​.