പ്രക്ഷോഭത്തിൽ നിന്ന് പിൻവാങ്ങിയ സംഘടന ഏതാണ്​?

ന്യൂഡൽഹി: ട്രാക്​ടർ പരേഡിനിടെ ഒരുസംഘം നടത്തിയ അക്രമങ്ങളുടെ പേരിൽ കർഷക പ്രക്ഷോഭത്തിൽ നിന്ന്​ പിൻമാറുകയാണെന്ന്​ വാർത്താ സമ്മേളനം നടത്തിയ രാഷ്ട്രീയ കിസാൻ മസ്ദൂർ സംഘതന്‍റെയും നേതാവായ വി.എം. സിങ്ങിന്‍റെയും നിലപാട്​ എന്താണെന്ന്​ പരിശോധിക്കുകയാണ്​ സമരത്തെ സജീവമായി നിരീക്ഷിക്കുന്ന മലയാളിയായ കെ. സ​ഹദേവൻ. നേരത്തെ ആൾ ഇന്ത്യാ കിസാൻ സംഘർഷ് സമിതി കോ-ഓർഡിനേഷൻ കമ്മിറ്റി (AIKSCC)യ​ുടെ കൺവീനറായിരുന്ന വി.എം. സിങ്ങിനെ ആ സ്​ഥാനത്ത്​ നിന്ന്​ ഡിസംബറിൽ പുറത്താക്കിയിരുന്നു. സമരസമിതിയുടെ അനുമതിയില്ലാതെ സർക്കാരുമായി ഒത്തുതീർപ്പ്​ ചർച്ച നടത്താൻ മുന്നിട്ടിറങ്ങിയതിനായിരുന്നു പ്രസ്​തുത നടപടി.

സ​ഹദേവന്‍റെ ഫേസ്​ബുക്​ പോസ്​റ്റിന്‍റെ പൂർണ രൂപം:

പ്രക്ഷോഭത്തിൽ നിന്ന് പിൻവാങ്ങിയ സംഘടന ആര്?
കർഷക സമരത്തിൽനിന്ന് പിന്മാറിയെന്ന് അവകാശപ്പെടുന്ന രാഷ്ട്രീയ കിസാൻ മസ്ദൂർ സംഘടനും അതിന്‍റെ നേതാവായ വി.എം. സിങ്ങും നേരത്തെ തന്നെ സംയുക്ത കിസാൻ മോർച്ചയിൽ നിന്ന് അകന്ന് നിന്ന് പ്രവർത്തിക്കുന്നവരാണ്​.

അദ്ദേഹം നേതൃത്വം നൽകുന്ന ആൾ ഇന്ത്യാ സംഘർഷ് കമ്മിറ്റി (AIKSC)യും ആൾ ഇന്ത്യാ കിസാൻ സംഘർഷ് സമിതി കോ-ഓർഡിനേഷൻ കമ്മിറ്റി (AIKSCC)യും രണ്ടാണെന്ന് മനസ്സിലാക്കേണ്ടതുണ്ട്. ദില്ലി ചലോ മൂവ്മെന്‍റ്​ ദില്ലി അതിർത്തികളിൽ എത്തിയ സമയത്ത് ആഭ്യന്തര മന്ത്രി അമിത് ഷായുടെ അഭ്യർത്ഥന മാനിച്ച് ദില്ലിയിൽ സർക്കാർ അനുവദിച്ച ​ഗ്രൗണ്ടിലേക്ക് പ്രക്ഷോഭകർ നീങ്ങണമെന്ന് ആവശ്യപ്പെട്ടതും ഇതേ വി.എം.സിങ്ങ് ആണ്.

ആവശ്യങ്ങൾ നേടാതെ ദില്ലി വിടില്ലെന്ന പ്രഖ്യാപനവുമായി ഏകോപന സമിതിയിലെ എല്ലാ സം​ഘടനകളും ഒരുമയോടെ സമരരം​ഗത്തുണ്ട്.
സമരത്തിന്‍റെ ​അടുത്ത ഘടത്തെ സംബന്ധിച്ച പ്രഖ്യാപനങ്ങൾ ഉടനുണ്ടാകും.
യോ​ഗേന്ദ്ര യാദവ് അടക്കമുള്ള നേതാക്കളെ പോലീസ് ഡീറ്റെൻ ചെയ്തിരിക്കുകയാണ്.