എല്ലാ റൗഡികളും ബി.ജെ.പിയിലുളളപ്പോൾ ക്രമസമാധാനത്തെ കുറിച്ച് സംസാരിക്കാൻ മോദിക്ക് എന്ത് അവകാശമാണുള്ളത് - എം.കെ സ്റ്റാലിൻ

ചെന്നൈ: തമിഴ്നാട്ടിൽ ക്രമസമാധാന നില തകരാറിലാണെന്ന പ്രധാനമന്ത്രി നരേന്ദ്ര മോദിയുടെ വാദത്തിന് പ്രതികരണവുമായി മുഖ്യമന്ത്രി എം.കെ സ്റ്റാലിൻ. എല്ലാ റൗഡികളും ബി.ജെ.പിയിലുളളപ്പോൾ സംസ്ഥാനത്തെ ക്രമസമാധാനത്തെ കുറിച്ച് സംസാരിക്കാൻ പ്രധാനമന്ത്രിക്ക് എന്ത് അവകാശമാണുള്ളതെന്നും സ്റ്റാലി‍ൻ ചോദിച്ചു. സേലത്തെ ഡി.എം.കെ സ്ഥാനാർത്ഥി ടി.എം സെൽവ​ഗണപതിക്ക് വേണ്ടിയുള്ള തെരഞ്ഞെടുപ്പ് പ്രചരണത്തിനിടെയായിരുന്നു അദ്ദേഹത്തിന്റെ പരാമർശം.

"ബി.ജെ.പിയിൽ 261 ക്രമിനൽ പശ്ചാത്തലമുള്ള നേതാക്കളുണ്ട്. എല്ലാ റൗഡികളും പ്രധാനമന്ത്രിയുടെ പാർട്ടിയിലിരിക്കുമ്പോൾ ക്രമസമാധാനത്തെ കുറിച്ച് പറയാൻ മോദിക്ക് എന്ത് അവകാശമാണുള്ളത്?", സ്റ്റാലിൻ പറഞ്ഞു.

ബിജെപി നേതാക്കൾക്കെതിരെ 1,977 കേസുകൾ ഉണ്ടെന്നും സ്റ്റാലിൻ വെളിപ്പെടുത്തി.