പ്രതിഷേധവുമായി നോം ചോംസ്​കിയും; 'ഉമറിനെ ഉൾപ്പെടെ വിട്ടയക്കുക, ഡൽഹിയിൽ നടക്കുന്നത്​ മനുഷ്യ വേട്ട'

ഡൽഹി: വടക്കുകിഴക്കൻ ഡൽഹിയിലുണ്ടായ കലാപവുമായി ബന്ധപ്പെട്ട് നടക്കുന്ന മനുഷ്യവേട്ടയിൽ പ്രതിഷേധിച്ച്​ അന്താരാഷ്​ട്ര കൂട്ടായ്​മ. വിദ്യാഭ്യാസ വിദഗ്​ധരും ചലച്ചിത്ര പ്രവർത്തകരും എഴുത്തുകാരും ഉൾപ്പെടെ 200 ഓളം പേരാണ്​ സംയുക്​ത പ്രസ്​താവനയുമായി രംഗത്ത്​ വന്നത്​. ഭാഷാ പണ്ഡിതനും ആക്​ടീവിസ്​റ്റുമായ നോം ചോംസ്​കി സംവിധായിക മീരാ നായർ, നടൻ രത്‌ന പതക് ഷാ, എഴുത്തുകാരായ അമിതാവ് ഘോഷ്, സൽമാൻ റുഷ്ദി, അരുന്ധതി റോയ്, പത്രപ്രവർത്തകൻ പി. സായിനാഥ്​, ചലച്ചിത്ര നിർമാതാവ് നകുൽ സാവ്‌നി, പ്രശസ്ത പണ്ഡിതരായ ജൂഡിത്ത് ബട്‌ലർ, റോമില ഥാപ്പർ, ഷെൽഡൻ പൊള്ളോക്ക് തുടങ്ങിയവർ സംഘത്തിലുണ്ട്​.

'തുല്യ പൗരത്വ അവകാശങ്ങൾ നിഷേധിക്കുന്ന സി‌എ‌എ-എൻ‌ആർ‌സിക്കെതിരെ പ്രതിഷേധിച്ചതിന് ഉമർ ഖാലിദിനെയും വ്യാജമായി പ്രതിചേർത്തതും അന്യായമായി തടവിലാക്കപ്പെട്ടവരുമായ എല്ലാവരെയും മോചിപ്പിക്കണമെന്ന് ഞങ്ങൾ ഇന്ത്യാ സർക്കാരിനോട് ആവശ്യപ്പെടുന്നു. ഭരണഘടനയ്ക്ക് വിധേയരായ സത്യപ്രതിജ്ഞ ചെയ്​തവരെന്ന നിലയിൽ ഡൽഹി പൊലീസ്​ കലാപത്തെക്കുറിച്ച് നിഷ്​പക്ഷതയോടെ അന്യേഷിക്കണമെന്നും ആവശ്യപ്പെടുന്നു'-പ്രസ്​താവന പറയുന്നു.

'കലാപക്കേസിൽ കെട്ടിച്ചമച്ച തെളിവുകൾ ഉപയോഗിച്ച്​ 2020 സെപ്റ്റംബർ 14ന് ഡൽഹിയിൽ അറസ്റ്റുചെയ്ത ധീരനായ യുവ പണ്ഡിതനും ആക്ടിവിസ്റ്റുമായ ഉമർ ഖാലിദിന്​ ഞങ്ങൾ ​െഎക്യദാർഢ്യം പ്രഖ്യാപിക്കുന്നു. എന്താണ്​ ഉമർ ചെയ്​ത കുറ്റം. ത​െൻറ രാജ്യത്തോടുള്ള പ്രതിബദ്ധതയാണ്​ തുല്യ പൗരത്വത്തിനുവേണ്ടിയുള്ള പ്രക്ഷോഭത്തിൽ അണിനിരക്കാൻ അദ്ദേഹത്തെ ​പ്രേരിപ്പിച്ചത്​. ഒരു മതേതര രാഷ്ട്രത്തിൽ ഇത്തരമൊരു നിയമത്തിന്​ ഒരു സ്​ഥാനവുമില്ലെന്ന്​ ഞങ്ങൾ മനസിലാക്കുന്നു'എന്നും പ്രസ്​താവന പറയുന്നു.

ഉമർ ഗൂഢാലോചന നടത്തിയെന്ന്​ കുറ്റപത്രത്തിൽ ആരോപിക്കപ്പെടുന്ന ആളുകൾ തീവ്രവാദികളൊ ഭീകരവാദികളൊ അല്ല. ഡൽഹി കലാപത്തെക്കുറിച്ച്​ ഇപ്പോൾ നടക്കുന്ന പോലീസ് അന്വേഷണം അന്വേഷണമല്ലെന്നും ഇത് മുൻകൂട്ടി തീരുമാനിച്ച മനുഷ്യ വേട്ടയാണെന്നും പ്രസ്താവനയിലുണ്ട്​. 'ഏതൊരു ജനതയുടേയും ഭാവി അവിടത്തെ യുവാക്കളാണ്. യുവാക്കൾക്ക് നീതി നേടിക്കൊടുക്കുന്നത്​ ഭാവി ജനാധിപത്യത്തോട്​ നാം കാണിക്കുന്ന നീതിപൂർവ്വകമായ പ്രവർത്തിയായിരിക്കും' എന്ന്​ പറഞ്ഞാണ്​ പ്രസ്​താവന അവസാനിക്കുന്നത്​.