ഭേദഗതി ഞങ്ങൾക്ക്​ വേണ്ട, നിയമങ്ങൾ പിൻവലിക്കണം; സമരം തുടരും -കർഷകർ

ന്യൂഡൽഹി: കർഷക ദ്രോഹപരമായ നിയമങ്ങൾ പിൻവലിക്കലല്ലാതെ സമരത്തിന്​ പരിഹാരമില്ലെന്ന്​ കർഷകർ. വ്യാഴാഴ്​ച കേന്ദ്രസർക്കാറുമായി നടത്തിയ മണിക്കൂറുകൾ നീണ്ട ചർച്ച പരാജയ​പ്പെട്ടതിനുപിന്നാലെ മാധ്യമങ്ങളോടാണ്​ കർഷകനേതാക്കൾ നിലപാട്​ വ്യക്​തമാക്കിയത്​.

'നിയമം ഭേദഗതി ചെയ്യുമെന്നാണ്​ സർക്കാർ പറയുന്നത്​. ഞങ്ങൾക്ക്​ ഭേദഗതി ആവശ്യമില്ല. മൂന്ന്​ നിയമങ്ങളും പൂർണമായും പിൻവലിക്കുകയാണ്​ വേണ്ടത്​. താങ്ങുവില യഥാർഥ രൂപത്തിൽ നടപ്പാക്കണം' -കർഷക നേതാവ് ബൽ‌ദേവ് സിങ്​ സിർസ​ പറഞ്ഞു. ചർച്ചക്കിടെ സർക്കാർ നൽകിയ ഭക്ഷണമോ, ചായയോ കഴിക്കാൻ പോലും 40ഓളം വരുന്ന സമര നേതാക്കൾ കൂട്ടാക്കിയിരുന്നില്ല.

അതേസമയം, പ്രക്ഷോഭം അവസാനിപ്പിക്കണമെന്ന അഭ്യർഥനയുമായി കേന്ദ്ര കൃഷി മന്ത്രി നരേന്ദ്ര സിങ്​ തോമർ വീണ്ടും രംഗത്തെത്തി. 'സർക്കാർ ചർച്ച തുടരും. പ്രശ്​നങ്ങൾക്ക്​ തീർച്ചയായും പരിഹാരം കാണും. സമരം കാരണം ഡൽഹിയിലെ ജനങ്ങളെ ബുദ്ധിമുട്ടിലാക്കാതിരിക്കാൻ കർഷകരോട്​ ഞാൻ അഭ്യർത്ഥിക്കുകയാണ്​ -മന്ത്രി നരേന്ദ്ര സിങ്​ തോമർ മാധ്യമങ്ങളോട്​ പറഞ്ഞു. കാര്യങ്ങൾ സംബന്ധിച്ച്​ കൂടുതൽ വ്യക്​തത കൈവന്നതായും ശനിയാഴ്ച നടക്കുന്ന ചർച്ചയിൽ പരിഹാരം കാണുമെന്നും വാണിജ്യ വ്യവസായ മന്ത്രി സോം പ്രകാശ് പറഞ്ഞു. അതേ ദിവസം തന്നെ പ്രക്ഷോഭം അവസാനിക്കുമെന്നാണ്​ പ്രതീക്ഷിക്കുന്നതെന്നും മന്ത്രി വ്യക്​തമാക്കി.

അതിനിടെ, ചർച്ച പരാജയപ്പെട്ട സാഹചര്യത്തിൽ ഡൽഹി അതിർത്തികളിൽ കർഷകസമരം തുടരും. വെള്ളിയാഴ്ച കർഷക സംഘടനാ പ്രതിനിധികൾ യോഗം ചേർന്ന് സാഹചര്യങ്ങൾ ചർച്ച ചെയ്യും.