മയൂർ ഷെൽക്കെയുടെ ധീരതയെ അടിച്ചമർത്താൻ​ ശ്രമിച്ചോ​? യഥാർഥ സി.സി.ടി.വി ദൃശ്യങ്ങളെവിടെ?

ന്യൂഡൽഹി: റെയിൽവേ ട്രാക്കിൽ വീണുകിടക്കുന്ന ആറുവയസുകാരനെ​ കുതിച്ചു പാഞ്ഞുവരുന്ന ട്രെയിനിന്​ മുമ്പിൽനിന്ന്​ ദൈവദൂതനെപ്പോലെ ഓടിയെത്തി രക്ഷ​െപ്പടുത്തുന്ന റെയിൽവേ ജീവനക്കാരൻ മയൂർ ഷെൽക്കെയുടെ യഥാർഥ സി.സി.ടി.വി ദൃശ്യങ്ങൾ എവിടെ? സി.സി.ടി.വി ദൃശ്യങ്ങൾ പ്രചരിക്കാതെ, സി.സി.ടി.വി ദൃശ്യം മൊബൈൽ ഫോണിൽ പകർത്തിയതുമാത്രം പ്രചരിക്കാൻ കാരണമെന്താണെന്നാണ്​ ഉയരുന്ന ചോദ്യം.

വാംഗനി റെയിൽവേ സ്​റ്റേഷൻ അധികൃതർ മയൂർ ഷെൽക്കെയുടെ സൽപ്രവർത്തിയെ അടിച്ചമർത്താൻ ശ്രമിച്ചുവെന്ന സംശയങ്ങളാണ്​ ഇപ്പോൾ പുറത്തുവരുന്നത്​. മറ്റെല്ലാ നല്ല പ്രവൃത്തികളെയും പോലെ സംഭവം ആസ്​ഥാനത്ത്​ റിപ്പോർട്ട്​ ചെയ്യണമെന്നും മയൂർ ഷെൽക്കെയും സഹപ്രവർത്തകരും വാംഗനി സ്​റ്റേഷൻ അധികൃതരെ അറിയിച്ചിരുന്നു. എന്നാൽ, മേലുദ്യോഗസ്​ഥരെ അറിയിക്കാൻ മാത്രമല്ല, സി.സി.ടി.വി ദൃശ്യങ്ങൾ നൽകാനും തയാറായില്ലെന്നാണ്​ പുറത്തുവരുന്ന വിവരം.

ഏപ്രിൽ 17 വൈകുന്നേരമാണ്​ സംഭവം. റെയിൽവേ പോയിന്‍റ്​മാനായ ഷെൽക്കെ ആറുവയസുകാരനെ കുതിച്ചുവരുന്ന ട്രെയിനിന്​ മുമ്പിൽ നിന്ന്​ അത്ഭുതകരമായി രക്ഷപ്പെടുത്തുകയായിരുന്നു. 13 സെക്കന്‍റുകൾ കൊണ്ടായിരുന്നു രക്ഷാപ്രവർത്തനം.

സംഭവത്തിന്‍റെ ദൃശ്യങ്ങൾ വൻതോതിൽ സമൂഹമാധ്യമങ്ങളിൽ പ്രചരിച്ചിരുന്നു. എന്നാൽ, മറ്റു ദൃശ്യങ്ങൾ പോലെ റെയിൽവേ ഔദ്യോഗികമായല്ല ​ദൃശ്യങ്ങൾ പുറത്തുവിട്ടതെന്നാണ്​ വിവരം. സ്​റ്റേഷൻ അധികൃതർ ദൃശ്യങ്ങൾ നൽകാൻ വിസ​മ്മതി​ച്ചതോടെ ഷെൽക്കെയും സഹപ്രവർത്തകരും സി.സി.ടി.വി ദൃശ്യങ്ങൾ മൊബൈലിൽ പകർത്തി സുഹൃത്തുക്കൾക്ക്​ അയച്ചുനൽകുകയായിരുന്നു. സുഹൃത്തുക്കൾ ചിലർ ഫേസ്​ബുക്കിലും ട്വിറ്ററിലും ദൃശ്യങ്ങൾ പങ്കുവെച്ചു. ഈ ദൃ​ശ്യങ്ങൾ നിമിഷങ്ങൾക്കകം വൈറലാകുകയും ചെയ്​തു.

ഷെൽക്കെയുടെ വിഡിയോക്ക്​ പ്രമുഖർ അഭിനന്ദനവുമായി എത്തിയതിന്​ ശേഷമാണ്​ റെയിൽവേ അധികൃതർ പ്രതികരണവുമായെത്തുന്നതെന്ന ആരോപണവും ഉയരുന്നുണ്ട്​.

വാംഗനി സ്​റ്റേഷൻ അധികൃതരുടെ നിസഹകരണത്തിനെതിരെ അന്വേഷണം വേണമെന്ന്​ ട്രേഡ്​ യൂനിയനുകൾ ആവശ്യപ്പെട്ടു. സമൂഹമാധ്യമങ്ങളിൽ സ​ുഹൃത്തുക്കൾ പങ്കുവെച്ചില്ലായിരുന്നെങ്കിൽ ലോകം മുഴുവൻ അഭിനന്ദനവുമായെത്തിയ സംഭവം കുറച്ചുപേരിലേക്ക്​ ചുരുങ്ങുമായിരുന്നുവെന്നും ട്രേഡ്​ യൂനിയനുകൾ കുറ്റ​െപ്പടുത്തി.