കോവിഡ് വാക്സിനേഷൻ സർട്ടിഫിക്കറ്റ് സമൂഹ മാധ്യമങ്ങളിൽ പങ്കുവെക്കരുതെന്ന് മുന്നറിയിപ്പ്

ന്യൂഡൽഹി: കോവിഡ് വാക്‌സിനേഷൻ സർട്ടിഫിക്കറ്റ് സമൂഹ മാധ്യമങ്ങളിൽ പങ്കുവെക്കരുതെന്ന് കേന്ദ്ര സർക്കാരിന്റെ മുന്നറിയിപ്പ്. കേന്ദ്ര ആഭ്യന്തര മന്ത്രാലയമാണ് സൈബർ സുരക്ഷ ബോധവത്കരണ ട്വിറ്റർ ഹാൻഡിലായ സൈബർ ദോസ്ത് അക്കൗണ്ടിലൂടെ മുന്നറിയിപ്പ് നൽകിയിരിക്കുന്നത്.

കോവിഡ് വാക്‌സിന്‍ സ്വീകരിച്ച പലരും സര്‍ട്ടിഫിക്കറ്റുകള്‍ സോഷ്യല്‍ മീഡിയയില്‍ പങ്കുവെക്കാറുണ്ട്. ഇതിൽ വ്യക്തിഗത വിവരങ്ങൾ സര്‍ട്ടിഫിക്കറ്റിൽ ഉള്ളതിനാൽ അവ തട്ടിപ്പ് സംഘങ്ങൾ ദുരുപയോഗം ചെയ്തേക്കാൻ ഇടയുണ്ട് എന്നതിനാലാണ് മുന്നറിയിപ്പ് നൽകിയിട്ടുള്ള്.

വാക്‌സിന്‍ സ്വീകരിച്ച തീയതി, സമയം, വാക്‌സിന്‍ നല്‍കിയ ആളുടെ പേര്, വാക്‌സിന്‍ സ്വീകരിച്ച സെന്റര്‍, രണ്ടാം ഡോസ് സ്വീകരിക്കേണ്ട തീയതി, ആധാര്‍ കാര്‍ഡിന്റെ അവസാന നാല് അക്കങ്ങൾ എന്നിവയാണ് സര്‍ട്ടിഫിക്കറ്റില്‍ ഉണ്ടാകുക. ഇതുപയോഗിച്ച് തട്ടിപ്പ് നടത്താൻ എളുപ്പമാണ് എന്നതിനാലാണ് വാക്സിനേഷൻ സർട്ടിഫിക്കറ്റ് പങ്കുവെക്കരുതെന്ന് നിർദേശം നൽകിയിട്ടുള്ളത്.