യു.പിയിൽ ജന്മദിനാഘോഷം കഴിഞ്ഞ്​ സുഹൃത്തിനൊപ്പം​ മടങ്ങിയ 17കാരൻ​ 'ലവ്​ ജിഹാദ്​' നിയമപ്രകാരം അറസ്റ്റിൽ

ലഖ്​നോ: ഉത്തർപ്രദേശിൽ ജന്മദി​നാഘോഷം കഴിഞ്ഞ്​ സുഹൃത്തിനെ വീട്ടിലെത്തിക്കാൻ പോയ മുസ്​ലിമായ 17കാരൻ​ 'ലവ്​ ജിഹാദ്​' നിയമപ്രകാരം അറസ്​റ്റിൽ. യു.പിയിലെ ബിജ്​​നോറിലാണ്​ സംഭവം. പെൺകുട്ടിയുടെ വീടിന്​ സമീപമാണ്​ 17കാര​ന്‍റെ വീടും. മാതാപിതാക്കൾക്കും നാലു സഹോദരങ്ങൾ​ക്കുമൊപ്പം ഒറ്റമുറി വീട്ടിലാണ്​ 17കാരന്‍റെ താമസം. കൗമാരക്കാരനെതിരെ മതപരിവർത്തന നിരോധന നിയമം, പോക്​സോ, എസ്​.സി/എസ്​.ടി നിയമം തുടങ്ങിയവയുടെ വകുപ്പുകൾ ചുമത്തിയാണ്​ അറസ്റ്റ് ചെയ്​തത്​​.

ഡിസംബർ 14നാണ്​ കേസിനാസ്​പദമായ സംഭവം. ദലിത്​ പെൺകുട്ടിയും മുൻ സഹപാഠിയായ കൗമാരക്കാരനും സുഹൃത്തിന്‍റെ ജന്മദിനാഘോഷ പരിപാടിയിൽ പ​ങ്കെടുത്തശേഷം വീട്ടിലേക്ക്​ മടങ്ങുകയായിരുന്നു. ഇരുവരെയും പിന്നീട്​ ഒരു സംഘം പിന്തുടർന്നു. 17കാരനെ മർദ്ദിക്കുകയും ചോദ്യം ചെയ്യുകയും ചെയ്​തു. വ്യത്യസ്​ത മതവിഭാഗത്തിൽപ്പെട്ടവരാണെന്ന്​ തെളിഞ്ഞതോടെ ഇരുവരെയും പ്രദേശത്തെ പൊലീസ്​ സ്​റ്റേഷനിലെത്തിക്കുകയായിരുന്നു.

പിന്നീട്​ പെൺകുട്ടിയുടെ പിതാവിന്‍റെ പരാതിയിൽ എഫ്​.ഐ.ആർ രജിസ്റ്റർ ചെയ്​തതായി പൊലീസ്​ അറിയിച്ചു. വിവാഹം കഴിക്കാനും മതപരിവർത്തനം ചെയ്യാനുമുള്ള ലക്ഷ്യത്തോടെ പെൺകുട്ടിയെ ഒളിച്ചോടാൻ പ്രേരിപ്പിച്ചെന്ന പരാതിയുടെ പേരിലാണ്​ അറസ്​റ്റെന്നും എഫ്​.ഐ.ആറിൽ പറയുന്നു.

അതേസമയം, പെൺകുട്ടിയുടെ പിതാവ്​ പരാതി നിഷേധിച്ചു. പൊലീസിന്‍റെ നി​ർദേശമനുസരിച്ചാണ്​ പ്രസ്​താവന നടത്തിയതെന്നും പിതാവ്​ പറഞ്ഞു. 'ഞാൻ എന്‍റെ മകളെ പൂർണമായും വി​ശ്വസിക്കുന്നു. അവൾ എന്തുതെറ്റാണ്​ ചെയ്​തത്​. എന്തിനാണ്​ അവളെ രാഷ്​ട്രീയ​ത്തിന്‍റെ ഭാഗമാക്കുന്നത്​. ഒരു പെൺകുട്ടിയും ആൺകുട്ടിയും ഒരുമിച്ച്​ നടന്നാൽ അത്​ നിയമവിരുദ്ധമാകുമോ?' -പിതാവ്​ ചോദിച്ചു.

യുവാവ് ഇപ്പോൾ ബിജ്​നോറിലെ ജയിലിലാണ്​. യുവാവിന്​ 18 വയസായെന്നാണ്​ പൊലീസ്​ വാദം. അറസ്റ്റിലായ കൗമാരക്കാരന്​ 17 വയസ്​ മാത്രമാണ്​ പ്രയമെന്നും പ്രായം തെളിയിക്കുന്ന രേഖകൾ കൈയി​ല​ില്ലെന്നും കുടുംബം പറയുന്നു.

17കാരൻ ഇപ്പോൾ ജുഡീഷ്യൽ കസ്റ്റഡിയിലാണുള്ളത്​. കൗമാരക്കാരന്​ പ്രായപൂർത്തിയായിട്ടില്ലെന്ന്​ തെളിയിക്കാൻ രേഖകൾ ഹാജരാക്കണം. പെൺകുട്ടിയെ ചോദ്യം ചെയ്​തതിന്​ ശേഷവും പിതാവിന്‍റെ പരാതിയുടെ അടിസ്​ഥാനത്തിലുമാണ്​ ഉചിതമായ നടപടി ഇയാൾക്കെതിരെ സ്വീകരിച്ചതെന്നും ധാംപുർ സ​്​​റ്റേഷൻ ഹൗസ്​ ഓഫിസ്​ അരുൺ കുമാർ പറഞ്ഞു.

'ഞാൻ എന്‍റെ സുഹൃത്തിനൊപ്പം നടക്കുന്നതിൽ ഒരു സംഘം പുരുഷൻമാർക്കായിരുന്നു പ്രശ്നം. അത്​ ഞാൻ മജിസ്​ട്രേറ്റിനോട്​ പറഞ്ഞു. ഇനിയും അതുതന്നെ പറയും. അവർ എന്‍റെ വിഡിയോകൾ എടുത്തു. ഇപ്പോൾ ലവ്​ജിഹാദെന്ന പേരിൽ പ്രചരിപ്പിക്കുന്നു. ഞാൻ ഒരു തെറ്റും ചെയ്​തിട്ടില്ല. എന്‍റെ സ്വന്തം ഇഷ്​ടത്തിനാണ്​ പോയത്​' -പെൺകുട്ടി ഇന്ത്യൻ എക്​സ്​പ്രസിനോട്​ പറഞ്ഞു.

മകനെ ഒന്നു കാണാൻ കഴിഞ്ഞാൽ മാത്രം മതിയെന്നും തെറ്റായ പരാതിയിലാണ്​ മകനെ കസ്റ്റഡിയിലെടുത്തതെന്നും കൗമാരക്കാരന്‍റെ മാതാവ്​ പറഞ്ഞു. മകൻ പ്രായപൂർത്തിയായിട്ടില്ലെന്ന്​ തെളിയിക്കാൻ യാതൊരു രേഖയും കൈവശമില്ലെന്നും മകനെതിരായ കേസിൽ പോരാടാൻ പണം സ്വരൂപിക്കുകയാണെന്നും മാതാവ്​ കൂട്ടിച്ചേർത്തു.