കൂട്ടബലാത്സംഗത്തിനിരയായ പെൺകുട്ടി വീണ്ടും പീഡിക്കപ്പെട്ടു

ഭോപ്പാൽ: മധ്യപ്രദേശിൽ കൂട്ടബലാത്സംഗത്തിനിരയായ പതിനാലുകാരി വീണ്ടും പീഡിപ്പിക്കപ്പെട്ടു. ചന്ദ്​വാരയിലെ വീട്ടിൽ നിന്ന്​ ജൂലൈ ആറിന്​ വൈകിട്ടാണ്​ പെൺകുട്ടിയെ കാണാതാവുകയായിരുന്നു.  പെൺകുട്ടി​യെ കാണാനില്ലെന്ന്​ കാണിച്ച്​ രക്ഷിതാക്കൾ കുന്ദിപുര പൊലീസ്​ സ്​റ്റേഷനിൽ പരാതി നൽകിയിരുന്നു. തുടർന്ന്​ പൊലീസ്​ നടത്തിയ തെരച്ചിലിൽ മഹാ തോല ഏരിയയിൽ നിന്നും അവശനിലയിലായ പെൺകുട്ടിയെ കണ്ടെത്തി. സംഭവത്തിൽ അഞ്ചു പ്രതികളെ പൊലീസ്​ അറസ്​റ്റു ചെയ്​തു.

വീട്ടിലേക്ക്​ വരികയായിരുന്ന പെൺകുട്ടിയെ ബൈക്കിൽ എത്തിക്കാമെന്ന്​ പറഞ്ഞ്​ മോഹിത്​ ഭരദ്വാജ്​ എന്നയാൾ കൂട്ടികൊണ്ടുപോവുകയായിരുന്നു. ഇയാൾ പെൺകുട്ടിയെ സുഹൃത്ത്​ രാഹുൽ ബോണ്ഡെയുടെ വീട്ടിലെത്തിക്കുകയും ഇരുവരും ചേർന്ന്​ ബലാത്സംഗം ചെയ്യുകയുമായിരുന്നുവെന്ന്​ എ.എസ്​.പി നീരജ്​ സോണി പറഞ്ഞു. അടുത്ത ദിവസമാണ്​ ഇവർ പെൺകുട്ടിയെ തുറന്നുവിട്ടത്​. വീട്ടിലേക്ക്​ മടങ്ങുകയായിരുന്ന പെൺകുട്ടിയെ മൂന്നംഗസംഘം പിടികൂടി ബോണ്ഡെയുടെ വീട്ടിൽ തന്നെ എത്തിക്കുകയും വീണ്ടും കൂട്ടബലാത്സംഗത്തിന്​ ഇരയാക്കുകയും ചെയ്​തു. 

പെൺകുട്ടിയുടെ മൊഴിയുടെ അടിസ്ഥാനത്തിൽ മോഹിത്​ ഭരദ്വാജ്​, രാഹുൽ ബോണ്ഡെ,  ബണ്ഡി ബൽവാനി, അങ്കിത്​ രഘുവാൻഷി, അമിത്​ വിശ്വകർമ  തുടങ്ങിയവരെ പൊലീസ്​ അറസ്​റ്റു ചെയ്​തു.
കൂട്ടബലാത്സംഗം, തട്ടികൊണ്ടുപോകൽ, ക്രിമിനൽ ഗൂഢാലോചന തുടങ്ങിയ കുറ്റങ്ങളാണ്​ പ്രതികൾക്കു മേൽ ചുമത്തിയിരിക്കുന്നത്​.