വോട്ടവകാശം: തെരഞ്ഞെടുപ്പ് കമീഷനെ തിരുത്തി സുപ്രീംകോടതി

ന്യൂഡൽഹി: വോട്ടവകാശം സംബന്ധിച്ച തെരഞ്ഞെടുപ്പ് കമീഷ‍െൻറ വ്യാഖ്യാനം തള്ളി സുപ്രീംകോടതി. ചട്ടപ്രകാരമുള്ള അവകാശമാണെന്ന് പറഞ്ഞ തെരഞ്ഞെടുപ്പ് കമീഷ‍െൻറ അഭിഭാഷകനെ ജസ്റ്റിസ് കെ.എം. ജോസഫ് തിരുത്തി: ''വോട്ട് ഭരണഘടനാപരമായ അവകാശമാണ്''.

തെരഞ്ഞെടുപ്പ് കമീഷണർമാരുടെ നിയമനത്തിന് സ്വതന്ത്ര സംവിധാനം വേണമെന്ന് ആവശ്യപ്പെടുന്ന ഹരജിയിൽ വാദംകേൾക്കുകയായിരുന്നു കോടതി. ഭരണഘടനയുടെ 326ാം അനുച്ഛേദം വോട്ട് ഭരണഘടനാപരമായ അവകാശമാണെന്ന് വ്യക്തമാക്കുന്നുണ്ടെന്ന് ജസ്റ്റിസ് ജോസഫ് വിശദീകരിച്ചു. വോട്ട് മൗലികമായ അവകാശമാണെന്നുംഅദ്ദേഹം പറഞ്ഞു.