റോഡിൽ വെള്ളക്കെട്ട്; യു.പിയിൽ മെഡിക്കൽ കോളജ് പ്രിൻസിപ്പലിനെ സ്ട്രെക്ചറിൽ ചുമന്ന് ജീവനക്കാർ

​ലഖ്നോ: യു.പിയിലെ റോഡിൽ വെളളക്കെട്ടുണ്ടായതിനെ തുടർന്ന് മെഡിക്കൽ കോളജ് പ്രിൻസിപ്പലിനെ സ്ട്രെക്ചറിൽ ചുമന്ന് ജീവനക്കാർ. ഷാജഹാൻപൂർ മെഡിക്കൽ കോളജ് പ്രിൻസിപ്പാലിനെയാണ് വെള്ളക്കെട്ട് ഒഴിവാക്കാനായി ജീവനക്കാർ സ്ട്രക്ചറിൽ ചുമന്ന് കൊണ്ടു പോയത്. മെഡിക്കൽ കോളജ് പ്രിൻസിപ്പലിനെ ജീവനക്കാർ സ്ട്രക്ചറിൽ ചുമക്കുന്നതിന്റെ വിഡിയോ ദൃശ്യങ്ങൾ വ്യാപകമായി പ്രചരിക്കുന്നുണ്ട്.

പ്രിൻസിപ്പലിന്റെ പാന്റ് നനയാതിരിക്കാൻ വേണ്ടിയാണ് ജീവനക്കാർ ഇത്തരത്തിൽ സ്ട്രക്ചറിൽ ചുമന്നതെന്നാണ് റിപ്പോർട്ട്. അതേസമയം, മെഡിക്കൽ കോളജിലെ ജീവനക്കാർ മുട്ടോളം വെള്ളത്തിൽ മുങ്ങിയാണ് പ്രിൻസിപ്പലിനേയും കൊണ്ട് നടക്കുന്നത്.

സംഭവം വിവാദമായതോടെ വിഷയത്തിൽ പ്രതികരണവുമായി മെഡിക്കൽ കോളജ് പ്രിൻസിപ്പൽ രംഗത്തെത്തി. തന്റെ കാലിന് പരിക്കുണ്ടെന്നും കൂടാതെ പ്രമേഹ രോഗിയാണെന്നും പ്രിൻസിപ്പാൽ പറഞ്ഞു. നടക്കാൻ കഴിയാത്ത സാഹചര്യത്തിൽ തന്റെ സഹപ്രവർത്തകർ സ്ട്രെക്ചറിൽ തന്നെ കൊണ്ടു പോകാമെന്ന് അറിയിക്കുകയായിരുന്നു. പാന്റ് നനയാതിരിക്കാൻ വേണ്ടിയല്ല സഹപ്രവർത്തകർ ത​ന്നെ സ്ട്രക്ചറിൽ ചുമന്നതെന്നും അദ്ദേഹം അറിയിച്ചു.