രാമക്ഷേത്രമല്ല; വികസനമാണ്​ തെരഞ്ഞെടുപ്പിലെ പ്രധാന വിഷയം- ശിവരാജ്​ സിങ്​ ചൗഹാൻ

ന്യൂഡൽഹി: രാമക്ഷേത്രമല്ല വികസനമാണ്​ മധ്യപ്രദേശ്​ തെരഞ്ഞെടുപ്പിലെ മുഖ്യ വിഷയമെന്ന്​ മുഖ്യമന്ത്രി ശിവരാജ്​ സിങ്​ ചൗഹാൻ. ജനങ്ങൾക്ക്​ നൽകിയ വാഗ്​ദാനങ്ങൾ പാലിക്കാനാണ്​ സർക്കാർ ശ്രമം. വികസന നയവുമായി സർക്കാർ മുന്നോട്ട്​ പോകുമെന്നും ചൗഹാൻ വ്യക്​തമാക്കി. ടൈംസ്​ ഒാഫ്​ ഇന്ത്യക്ക്​ നൽകിയ അഭിമുഖത്തിലാണ്​ ചൗഹാൻ ഇക്കാര്യങ്ങൾ പറഞ്ഞത്​.

യഥാർഥ വിഷയത്തിൽ നിന്ന്​ വ്യതിചലിക്കാനാണ് കോൺഗ്രസ്​​ ശ്രമം. തന്നെയും കുടുംബത്തെയും വിമർശിക്കാനാണ്​ കോൺഗ്രസ്​ സമയം കണ്ടെത്തുന്നത്​. 2008ലെ തെരഞ്ഞെടുപ്പിൽ ബി.ജെ.പി പരാജയപ്പെടുമെന്നാണ്​ പ്രവചിക്കപ്പെട്ടിരുന്നത്​. എന്നാൽ, 143 സീറ്റ്​ നേടി സംസ്ഥാനത്ത്​ അധികാരത്തിലെത്താൻ പാർട്ടിക്ക്​ സാധിച്ചു.

വിമത ഭീഷണിയെ ഭയക്കുന്നില്ലെന്നും ശിവരാജ്​ സിങ്​ ചൗഹാൻ വ്യക്​തമാക്കി. കോൺഗ്രസും വിമത ഭീഷണി നേരിടുന്നുണ്ട്​. സംസ്ഥാനത്ത്​ താൻ ഒറ്റക്കല്ല. ബി.ജെ.പിയുടെ മുഴുവൻ പ്രവർത്തകരും തന്നോടൊപ്പമുണ്ടെന്നും ചൗഹാൻ പറഞ്ഞു.