ഒരാഴ്​ചക്കിടെ കൊല്ലപ്പെട്ടത്​ ദുബെയടക്കം ആറുപേർ; വ്യാജ ഏറ്റുമുട്ടലെന്ന്​ ​സുപ്രീം കോടതിയിൽ ഹരജി

ന്യൂഡൽഹി: എട്ട്​ പൊലീസുകാരെ കൊലപ്പെടുത്തിയ കുപ്രസിദ്ധ കുറ്റവാളി വികാസ്​ ദുബെയെ പൊലീസ്​ ​വധിച്ചതോടെ ഇയാളുടെ സംഘത്തിൽ ഒരാഴ്​ചക്കിടെ മരിച്ചത്​ ആറുപേർ.​ കഴിഞ്ഞ വ്യാഴാഴ്​ച രാത്രിയാണ്​ ദുബെയെ പിടിക്കാനെത്തിയ എട്ടുപൊലീസുകാരെ ഇയാളുടെ അനുയായികൾ വെടിവെച്ചുകൊന്നത്​. 

ഇതിനുപിന്നാലെ വിവിധ ഇടങ്ങളിലായി ദുബെയുടെ അഞ്ച്​ സഹായികളെ പൊലീസ്​ കൊലപ്പെടുത്തിയിരുന്നു. ഏറ്റവും ഒടുവിൽ ഇന്ന്​ രാവിലെ നടന്ന ഏറ്റുമുട്ടലിൽ വികാസ് ദുബെയും കൊല്ലപ്പെട്ടു. അപകടത്തിൽപ്പെട്ട പൊലീസ് വാഹനത്തിൽനിന്ന്​ രക്ഷപ്പെടാൻ ഇയാൾ തോക്ക്​ തട്ടിയെടുത്തുവെന്നും തുടർന്ന് വെടിവെച്ച്​ കൊല്ലുകയായിരുന്നുവെന്നുമാണ്​ പൊലീസ്​ പറയുന്നത്​.

എന്നാൽ, ദുബെയുടെ സംഘത്തിന്​ നേരെ നടക്കുന്നത്​ വ്യാജ ഏറ്റുമുട്ടലാണെന്ന്​ പരക്കെ ആക്ഷേപമുയരുന്നുണ്ട്​. ബി.ജെ.പി നേതാക്കൾ അടക്കമുള്ളവരുമായി സജീവ ബന്ധം പുലർത്തുന്ന ഇയാളെ രഹസ്യങ്ങൾ പുറത്താവാതിരിക്കാൻ ആസൂത്രിതമായി ഇല്ലാതാക്കുകയായിരുന്നുവെന്നാണ് ആരോപണം. ​സംഘാംഗങ്ങളായ അഞ്ച് പേരെ ഉത്തർപ്രദേശ് പൊലീസ് കൊലപ്പെടുത്തിയതിനെതിരെ സുപ്രീം കോടതിയിൽ ഹർജി നൽകിയിട്ടുണ്ട്. നടന്നത്​ വ്യാജ ഏറ്റുമുട്ടലാണെന്നും അന്വേഷണം വേണമെന്നും ആവശ്യ​പ്പെട്ട്​ അഭിഭാഷകനായ ഗാൻഷ്യം ഉപാധ്യായയാണ് കോടതിയെ സമീപിച്ചത്​. ഇക്കാര്യത്തിൽ അടിയന്തര വാദം കേൾക്കണമെന്നും അദ്ദേഹം ആവശ്യപ്പെട്ടു. 

Latest Video: