ടി.ടി.വി ദിനകരനുമായി സഖ്യം പ്രഖ്യാപിച്ച്​ നടൻ വിജയകാന്ത്​

ചെന്നൈ: സീറ്റ്​ വിഭജനത്തിൽ ഉടക്കി അണ്ണാ ഡി.എം.കെ സഖ്യം വിട്ട നടൻ വിജയകാന്തിന്‍റെ ഡി.എം.ഡി.കെ ടി.ടി.വി. ദിനകരന്‍റെ അമ്മ മക്കൾ മന്നേറ്റ കഴകവുമായി സഹകരിക്കും. 234 സീറ്റുകളിലേക്കുള്ള നിയമസഭ തെരഞ്ഞെടുപ്പിൽ 60 സീറ്റുകളിൽ ഡി.എം.ഡി.കെ മത്സരിക്കും.

ഡി.എം.ഡി.കെക്ക്​ നൽകിയ സീറ്റുകളിൽ നിന്ന്​ സ്​ഥാനാർഥികളെ പിൻവലിക്കുമെന്ന്​ എ.എം.എം.കെ വാർത്താകുറിപ്പിൽ അറിയിച്ചു.

ഡി.എം.ഡി.കെ പുറത്തുവിട്ട ആദ്യ പട്ടികയിൽ വിജയകാന്തിന്‍റെ ഭാര്യ പ്രേമലതയുടെ പേരുമുണ്ട്​. വിരുതചലത്തിൽ നിന്നാകും പ്രേമലത ജനവിധി തേടുക. മുൻ എം.​എൽ.എ പി. പാർഥസാരഥി വിരുഗാംപക്കത്ത്​ നിന്ന്​ മത്സരിക്കും.

'23 സീറ്റുകളും ഒരു രാജ്യസഭ സീറ്റുമായിരുന്നു ഞങ്ങൾ ആവശ്യപ്പെട്ടത്​. എന്നാൽ 15 സീറ്റിൽ കൂടുതൽ നൽകാൻ സാധിക്കി​ല്ലെന്ന്​ അണ്ണാ ഡി.എം.കെ പറഞ്ഞു' -പർഥസാരഥി സഖ്യം വിടാനുള്ള കാരണം വ്യക്തമാക്കി. അസദുദ്ദീൻ ഉ​ൈവസിയുടെ എ.ഐ.എം.ഐ.എമ്മും തമിഴ്​നാട്ടിൽ ദിനകരൻ സഖ്യത്തിലാണ്​ മത്സരിക്കുന്നത്​. മൂന്ന്​ സീറ്റുകളാണ്​ അവർക്ക്​ ലഭിച്ചത്​.

2005ൽ സ്​ഥാപിതമായ വിജയകാന്തിന്‍റെ പാർട്ടി 2006ലെ നിയമസഭ തെരഞ്ഞെടുപ്പിൽ 8.38 ശതമാനം വോട്ട്​ നേടി ഏവരെയും ഞെട്ടിച്ചിരുന്നു. 2009 ലോക്​സഭ തെരഞ്ഞെടുപ്പിൽ അവർ വോട്ട്​ വിഹിതം അൽപം കൂടി വർധിപ്പിച്ചു.

എന്നാൽ 2011 നിയമസഭ തെരഞ്ഞെടുപ്പിലായിരുന്നു അവരുടെ മികച്ച പ്രകടനം. 29 സീറ്റുകളാണ്​ അന്ന്​ പാർട്ടി നേടിയത്​. കോൺഗ്രസ്​, ഇടത്​ പാർട്ടികളുമായി കൈകോർത്താണ്​ ഡി.എം.കെ മത്സരിക്കുന്നത്​. അണ്ണാ ഡി.എം.കെ സഖ്യം വിട്ടതിന്​ പിന്നാലെ നടൻ കമൽഹാസൻ സഖ്യരൂപീകരണത്തിനായി ഡി.എം.ഡി.കെയെ ക്ഷണിച്ചിരുന്നു.