കേ​ന്ദ്രമന്ത്രിയെത്തുന്നതിന്​ മിനിറ്റുകൾക്ക്​ മുമ്പ്​ ബി.ജെ.പി യോഗത്തിൽ നേതാക്കൾ തമ്മിൽ വാക്കേറ്റം; വിഡിയോ വൈറൽ

ശ്രീനഗർ: ജമ്മു കശ്​മീരിൽ കേന്ദ്ര വ്യോമയാന മന്ത്രി ജ്യോതിരാദിത്യ സിന്ധ്യയുടെ സന്ദർശനത്തിന്​ തൊട്ടുമു​മ്പായി നടന്ന യോഗത്തിൽ ബി.ജെ.പി നേതാക്കൾ തമ്മിൽ വാക്കേറ്റം. സംഭവത്തിന്‍റെ വിഡിയോ ദൃശ്യങ്ങൾ വൻതോതിൽ സമൂഹമാധ്യമങ്ങളിൽ പ്രചരിച്ചു. ശ്രീനഗർ, ജവഹർ നഗറിലെ ബി.ജെ.പി ഓഫിസിലാണ്​ സംഭവം.

ജ്യോതിരാദിത്യ സിന്ധ്യയുടെ സന്ദർശനത്തിന്​ തൊട്ടുമുമ്പായിരുന്നു ബി.ജെ.പി നേതാക്കളുടെ യോഗം. സിന്ധ്യ എത്തുന്നതിന്​ മിനിറ്റുകൾക്ക്​ മുമ്പ്​ നേതാക്കളായ അലി മുഹമ്മദും മുഹമ്മദ്​ അഷ്​റഫും തമ്മിൽ വാക്കേറ്റമുണ്ടാകുകയായിരുന്നു. വാക്കേറ്റം രൂക്ഷമായതോടെ ഇരുനേതാക്കളും തമ്മിൽ കൈയാങ്കളിക്ക്​ മുതിർന്നു. ഇതോടെ മറ്റു നേതാക്കൾ ഇടപെട്ട്​ പിൻതിരിപ്പിക്കുന്നത്​ വിഡിയോയിൽ കാണാം.

സംഭവ സ്​ഥലത്തുണ്ടായിരുന്ന മാധ്യമപ്രവർത്തകരാണ്​ ദൃശ്യങ്ങൾ പകർത്തിയത്​. ഇവർ സമൂഹമാധ്യമങ്ങളിൽ വിഡിയോ പങ്കുവെക്കുകയും ചെയ്​തു.

യാതൊരു കാരണവുമി​ല്ലാതെയാണ്​ ഇരുനേതാക്കളും തമ്മിൽ വാക്കേറ്റമുണ്ടായതെന്ന്​ നേതാക്കൾ പ്രതികരിച്ചു. കൂടാതെ കേന്ദ്രമന്ത്രിയെത്തുന്നതിന്​ മുമ്പ്​ പ്രശ്​ന പരിഹാരത്തിനായിരുന്നു മറ്റു നേതാക്കളുടെ ശ്രമം.

ഇരുവരെയും പിന്തിരിപ്പിച്ച്​ മിനിറ്റുകൾക്കകം സിന്ധ്യ ബി.ജെ.പി ഓഫിസിലെത്തി. പാർട്ടി നേതാക്കളെ അഭിസംബോധന ചെയ്​ത്​ സംസാരിച്ചു.