കർണാടകയിൽ കോവിഡ്​ രോഗികളുടെ മൃതദേഹങ്ങൾ ഒന്നിച്ച്​ കുഴിച്ചുമൂടി

ബംഗളൂരു: കർണാടകയിലെ ബെള്ളാരിയിൽ കോവിഡ്​ ബാധിച്ച്​ മരിച്ചവരെ ഒന്നിച്ച്​ കുഴിച്ചുമൂടുന്നതി​െൻറ ദൃശ്യം പുറത്ത്​. മണ്ണുമാന്തി യന്ത്രം ഉപയോഗിച്ച്​ കുഴിയെടുത്തശേഷം മൃതദേഹങ്ങൾ ഒാരോന്നായി കുഴിയിൽ തള്ളുന്നതി​െൻറ രണ്ട്​ വിഡിയോ ദൃശ്യങ്ങളാണ്​ പുറത്തുവന്നത്​. സംഭവം വിവാദമായതോടെ ബെള്ളാരി ഡെപ്യൂട്ടി കമീഷണർ അന്വേഷണത്തിന്​ ഉത്തരവിട്ടു.

വിഡിയോ ശ്രദ്ധയിൽ​െപട്ടതായും വിഡിയോയു​െട ആധികാരികതയെ കുറിച്ചും സംഭവത്തെ കുറിച്ചും റിപ്പോർട്ട്​ തേടിയിട്ടുണ്ടെന്നും ബെള്ളാരി സ്വദേശികൂടിയായ ആരോഗ്യമന്ത്രി ബി. ശ്രീരാമുലു പ്രതികരിച്ചു. കോവിഡ്​ ബാധിച്ച്​ തിങ്കളാഴ്​ച ബെള്ളാരി ജില്ലയിൽ 12 പേർ മരിച്ചിരുന്നു.

വിജനമായ പ്രദേശത്ത്​ നിർത്തിയിട്ട വാനിൽനിന്ന്​ കറുത്ത കവറിൽ പൊതിഞ്ഞ മൃതദേഹങ്ങൾ പി.പി.ഇ കിറ്റ്​ ധരിച്ച ആരോഗ്യപ്രവർത്തകർ രണ്ടു കുഴികളിലേക്ക്​ തള്ളുന്ന ദൃശ്യങ്ങളാണ്​ പുറത്തുവന്നത്​. മണ്ണുമാന്തി യന്ത്രത്തി​െൻറ ഡ്രൈവർ പകർത്തിയതെന്ന്​ കരുതുന്ന വിഡിയോ യൂട്യൂബിൽ അപ്​ലോഡ്​ ചെയ്യുകയായിരുന്നു. മൃതദേഹങ്ങൾ കുഴിയിലിട്ട്​ മണ്ണുമൂടാൻ ഒരാൾ നിർദേശിക്കുന്നതും വിഡിയോയിൽ കേൾക്കാം.

കോവിഡ്​ ബാധിച്ച്​ മരിച്ചവരെ സംസ്​കരിക്കുന്നത്​ സംബന്ധിച്ച കേന്ദ്ര നിർദേശങ്ങൾ ലംഘിക്കപ്പെട്ടതായാണ്​ ദൃശ്യങ്ങൾ തെളിയിക്കുന്നത്​. വിഡിയോ സാമൂഹിക മാധ്യമങ്ങളില്‍ വൈറലായതോടെ മൃതദേഹങ്ങളോട്​ അനാദരവ്​ കാണിക്കുന്നതിനെതിരെ വ്യാപക വിമര്‍ശനമുയര്‍ന്നു. ബെള്ളാരി വ്യാവസായിക മേഖലയിലെ മാരമ്മ ക്ഷേത്രത്തിന്​ പിൻവശത്താണ്​ സംഭവം നടന്നതെന്നാണ്​ വിഡിയോ ദൃശ്യങ്ങളിൽ കാണുന്നതെന്ന്​ ബെള്ളാരി പബ്ലിക്​ ഇൻഫർമേഷൻ ഒാഫിസർ രാമലിംഗപ്പ പറഞ്ഞു.

അതേസമയം, വിവാദ സംഭവത്തിൽ കർണാടകയിലെ ബി.ജെ.പി സർക്കാറിനെ വിമർശിച്ച്​ പ്രതിപക്ഷ പാർട്ടിയായ ജെ.ഡി-എസ്​ രംഗത്തെത്തി. പ്രസ്​തുത വിഡിയോ സഹിതം ട്വീറ്റ്​ ചെയ്​ത ജെ.ഡി-എസ്​, കോവിഡ്​ ബാധിച്ച്​ മരണപ്പെടുന്നവരെ കർണാടക സർക്കാർ ഇത്തരത്തിലാണ്​ പരിഗണിക്കുന്നതെന്നും സർക്കാർ പറയുന്ന 'ആസൂത്രിത കോവിഡ്​ മാനേജ്​മെൻറ്​' ഇതാണെന്നും പരിഹസിച്ചു.