ആൾദൈവം രാംപാലിനെ രണ്ടു കേസിൽ കുറ്റവിമുക്തനാക്കി

ഹിസാർ(ഹരിയാന): ബലാത്സംഗക്കേസിൽ ശിക്ഷിക്കപ്പെട്ട ആൾദൈവം ഗുർമീത്​ റാം റഹിം സിങ്​ ജയിലിൽ കഴിയുന്ന ഹരിയാനയിൽ മറ്റൊരു ആൾദൈവത്തിന്​ കുറ്റമുക്​തി. കൊലപാതകം അടക്കമുള്ള കേസുകളിൽ ജയിലിൽ കഴിയുന്ന വിവാദ ആൾദൈവം രാംപാൽ ദാസിനെയും അനുയായികളെയുമാണ്​ ഹിസാറിലെ കോടതി വെറുതെവിട്ടത്​. 

2014 ലെ കലാപക്കേസിലും പൗരന്മാർക്കും പൊതുസ്വത്തിനും നാശനഷ്​ടമുണ്ടാക്കിയെന്ന മറ്റൊരു കേസിലുമാണ്​ 66കാരനായ രാംപാലും അനുയായികളും മോചിതരായത്​​. എന്നാൽ, 2005ൽ ഹിസാറിൽ ഒരു ഗ്രാമീണൻ വെടിയേറ്റുമരിച്ചതടക്കമുള്ള എട്ടു കേസുകളിൽ വിചാരണ നേരിടുന്നതിനാൽ ആൾദൈവത്തിന്​ ജയിലിൽ കഴിയേണ്ടിവരും.

2005ൽ അനുയായികൾ ഗ്രാമവാസികൾക്കുനേരെ നടത്തിയ ആക്രമണത്തിൽ ഒരാൾ കൊല്ലപ്പെട്ട കേസിൽ രാംപാലിനെ അറസ്​റ്റ്​ ചെയ്യാനെത്തിയപ്പോഴാണ്​ ആറുപേരുടെ മരണത്തിനിടയാക്കിയ കലാപമുണ്ടായത്​. 2014 നവംബർ 17ന്​ ബർവാലയിലെ സത്​ലോക്​ ആശ്രമത്തിലെത്തിയ പൊലീസും അനുയായികളും തമ്മിലുണ്ടായ ഏറ്റുമുട്ടലിൽ  അഞ്ച്​ സ്​ത്രീകളും ഒരു കുട്ടിയുമാണ്​ കൊല്ലപ്പെട്ടത്​. കൊലപാതക കേസിൽ ആൾദൈവം കോടതിയിൽ ഹാജരാകാതിരുന്നതിനെ തുടർന്നാണ്​ പഞ്ചാബ്​- ഹരിയാന ​േകാടതിയുടെ നിർദേശപ്രകാരം അറസ്​റ്റുചെയ്യാൻ പൊലീസ്​ ആശ്രമത്തിലെത്തിയത്​.

പൊലീസിനുനേരെ 15,000ത്തോളം അനുയായികൾ അക്രമം അഴിച്ചുവിടുകയായിരുന്നു. റോഡിലും റെയിൽവേട്രാക്കിലും കിടന്നും മനുഷ്യച്ചങ്ങല തീർത്തുമാണ്​ അനുയായികൾ പൊലീസിനെ തടഞ്ഞത്​. ഒടുവിൽ പൊലീസ്​ ആശ്രമത്തിലേക്ക്​ ഇരച്ചുകയറി രാംപാലിനെ അറസ്​റ്റുചെയ്യുകയായിരുന്നു. 

കലാപ കേസിൽ രാംപാലിനും അനുയായികൾക്കും എതിരെ തെളിവില്ലെന്നു ചൂണ്ടിക്കാട്ടിയാണ്​ കോടതി വെറുതെവിട്ടത്​.15ാം നൂറ്റാണ്ടിലെ കവിയായ കബീർ ദാസി​​െൻറ പിൻഗാമിയായാണ്​ സദ്​ഗുരു രാംപാൽജി മഹാരാജ്​ എന്ന രാംപാൽ അറിയപ്പെടുന്നത്​. കൊലപാതകം, രാജ്യദ്രോഹം അടക്കം 30ഒാളം​ കേസിലെ പ്രതിയായ രാംപാൽ 2014 മുതൽ ഹിസാർ സെൻ​ട്രൽ ജയിലിലാണ്​. 

രാഷ്​ട്രീയ സമാജ്​ സേവാ സമിതി എന്ന സായുധസേനയുടെ പിൻബലത്തിലാണ്​ ആൾദൈവം ​​ആശ്രമം അടക്കിവാണിരുന്നത്​. 2005ലെ കൊലപാതകത്തിനുശേഷം ഒമ്പതുവർഷമാണ്​ ഇയാൾ അറസ്​റ്റിൽനിന്ന്​ രക്ഷപ്പെട്ട്​ കഴിഞ്ഞത്​. ​സംഭവത്തിൽ രാംപാലിനും അനുയായികൾക്കും എതിരെ തെളിവില്ലെന്ന്​ കോടതി പറഞ്ഞു.