22 വര്‍ഷം തപാൽ വകുപ്പിനായി കാടും മലയും കയറിയ ജിപ്‌സിക്ക് വൈകാരിക യാത്രയയപ്പ്​

വെല്ലൂർ: അത്യപൂർവ്വമായ ഒരു യാത്രയയപ്പിനാണ്​ കഴിഞ്ഞദിവസം വെല്ലൂർ പോസ്​റ്റോഫീസ്​ സാക്ഷിയായത്​. 22 വർഷം തപാൽ വകുപ്പിനായി ഓടിയ മാരുതി ജിപ്​സിക്കാണ്​ പോസ്​റ്റോഫീസിലെ ഉദ്യോഗസ്​ഥർ ചേർന്ന്​ യാത്രയയപ്പ്​ നൽകിയത്​. പോസ്​റ്റോഫീസ് സൂപ്രണ്ടിന്‍റെ ഇന്‍സ്‌പെക്ഷന്‍ വാഹനമായി ഉപയോഗിച്ചിരുന്ന ജിപ്‌സി സേവനം പൂർത്തിയാക്കി മടങ്ങുന്ന വേളയിലായിരുന്നു ഇത്​.

ഇതിന്‍റെ ഭാഗമായി മാല ചാര്‍ത്തി വാഹനം അലങ്കരിക്കുകയും ജീവനക്കാര്‍ വാഹനത്തിന് സല്യൂട്ട് അര്‍പ്പിക്കുകയും ചെയ്തു. തുടര്‍ന്ന് എല്ലാവര്‍ക്കും മധുരം വിതരണവും നടന്നു. 1999 മാര്‍ച്ച് 24നാണ് വകുപ്പിനായി ജിപ്​സി വാങ്ങുന്നത്. കഴിഞ്ഞ 22 വര്‍ഷത്തിനുള്ളില്‍ 25 സൂപ്രണ്ടുമാര്‍ ഈ വാഹനം ഉപയോഗിച്ചു. മലയോര പ്രദേശങ്ങളിലെ പോസ്​റ്റോഫീസുകള്‍ സന്ദര്‍ശിക്കുന്നതിന്​ അവരുടെ പ്രധാന ആശ്രയം ഈ വാഹനമായിരുന്നു.

'സാധാരണ പോസ്​റ്റോഫീസുകളിൽ ഇത്തരം കീഴ്​വഴക്കങ്ങൾ ഇല്ല. പക്ഷേ, ഈ വാഹനവുമായുള്ള ഞങ്ങളുടെ വൈകാരിക ബന്ധത്തെ തുടർന്നാണ്​ ഈ യാത്രയയപ്പ്​ സംഘടിപ്പിച്ചത്​. ഉൾപ്രദേശങ്ങളിലും മലമുകളിലുമൊക്കെ ഞങ്ങളെ സുരക്ഷിതമായി എത്തിച്ചിരുന്ന വാഹനമാണിത്​. ഞാൻ കഴിഞ്ഞ മൂന്നുവർഷം ഇതിൽ യാത്ര ചെയ്​തു' -വെല്ലൂർ ഡിവിഷൻ പോസ്റ്റൽ സൂപ്രണ്ട്​ പി. കോമൾ കുമാർ പറയുന്നു.

22 വര്‍ഷത്തെ ഓട്ടത്തിനിടെ ഈ വാഹനത്തിന്​ ഒരു അപകടം പോലും ഉണ്ടായിട്ടില്ലെന്ന്​ 14 വർഷമായി ഇത്​ ഓടിക്കുന്ന പി. ശേഖർ പറഞ്ഞു. 'ഇപ്പോൾ ഞങ്ങൾക്ക്​ പുതിയ ജീപ്പ്​ കിട്ടി. പക്ഷേ, ഒരു ദശകത്തിലേറെ എന്നോടൊപ്പം ജോലി ചെയ്​ത ഒരു സഹപ്രവർത്തകൻ പിരിഞ്ഞ​ുപോകുന്ന പോലുള്ള അനുഭവമാണ്​ ഇപ്പോൾ എനിക്ക്​' -അദ്ദേഹം പറഞ്ഞു. പോസ്റ്റല്‍ വകുപ്പിന്‍റെ നിയമം അനുസരിച്ച് ജിപ്​സി മെയില്‍ മോട്ടോര്‍ സര്‍വീസിന് കൈമാറും. തുടര്‍ന്ന് സര്‍ക്കാര്‍ നിര്‍ദേശിച്ചിട്ടുള്ള മാനദണ്ഡങ്ങള്‍ പാലിച്ച് ഇത് പൊളിക്കുമെന്നും കോമൾ കുമാർ പറഞ്ഞു.

1985ലാണ് മാരുതി ജിപ്‌സി പുറത്തിറക്കിയത്. ഓഫ് റോഡ് ഉപയോഗത്തിനുള്ള കരുത്തുണ്ടായിരുന്ന ജിപ്​സി അക്കാലത്തെ ജനപ്രിയ വാഹനമായിരുന്നു. ഏതാനും വര്‍ഷം മുമ്പ് നിരത്തൊഴിഞ്ഞ ഈ വാഹനം ഇപ്പോള്‍ സൈന്യത്തിന് മാത്രമായാണ് നിര്‍മിക്കുന്നത്.