തൂത്തുക്കുടി സ്​റ്റെർലൈറ്റ്​ പ്ലാൻറ്​ അടച്ചുപൂട്ടിയ ഉത്തരവ്​ റദ്ദാക്കി

ചെന്നൈ: തൂത്തുക്കുടിയിലെ വേദാന്തയുടെ സ്​റ്റെർലൈറ്റ്​ കോപ്പർ പ്ലാൻറ്​ അടച്ചുപൂട്ടിയ തമിഴ്​നാട്​ സർക്കാർ ഉ ത്തരവ്​ ഹരിത ട്രൈബ്യൂണൽ റദ്ദാക്കി. പ്ലാൻറ് മലിനീകരണമുണ്ടാക്കുന്നു എന്നാരോപിച്ച്​ നാട്ടുകാർ നടത്തിയ സമരം പൊലീസ്​ വെടിവെപ്പിൽ കലാശിക്കുകയും 13 പേർ കൊല്ലപ്പെടുകയും ചെയ്​തതോടെയാണ്​ പ്ലാൻറ്​ അടച്ചുപൂട്ടാൻ സർക്കാർ ഉത്തരവിറക്കിയത്​.

വേദാന്തയുടെ കോപ്പർ പ്ലാൻറിന്​ പ്രവർത്തനാനുമതി മൂന്നാഴ്​ചക്കുള്ളിൽ പുതുക്കി നൽകണമെന്ന്​ സംസ്​ഥാന മലിനീകരണ നിയന്ത്രണ ബോർഡിനോട്​ കോടതി ഉത്തരവിട്ടു. പ്ര​ദേശവാസികളുടെ ക്ഷേമത്തിനായി മൂന്നു വർഷത്തിനുള്ളിൽ ഒരു കോടി രൂപ നൽകണമെന്ന്​ കമ്പനിയോടും കോടതി നിർദേശിച്ചിട്ടുണ്ട്​. കുടിവെള്ള വിതരണം, ആശുപത്രി, ആരോഗ്യ പദ്ധതികൾ, നൈപുണ്യ വികസനം തുടങ്ങിയ പദ്ധതികൾക്കായി തുക വിനിയോഗിക്കാമെന്ന്​ കമ്പനിയുടെ അഭിഭാഷകൻ കോടതിയെ അറിയിച്ചു.

കമ്പനി അടച്ചുപൂട്ടാൻ ഉത്തരവിടും മുമ്പ്​ വേണ്ട നടപടിക്രമങ്ങൾ പൂർത്തിയാക്കുന്നതിൽ സർക്കാർ പരാജയപ്പെട്ടുവെന്നും കോടതി നിരീക്ഷിച്ചു.