ബംഗളൂരുവിൽ മഴയെത്തി: വർത്തുർ തടാകം വീണ്ടും പതഞ്ഞു പൊങ്ങി

ബംഗളൂരു: അടിഞ്ഞു കൂടിയ മാലിന്യങ്ങളിലേക്ക്​ വേനൽമഴ പെയ്​തിറങ്ങിയപ്പോൾ വർത്തുർ തടാകം പതഞ്ഞു പൊങ്ങി. തടാകത്തിൽ നിന്നും റോഡിലും സമീപപ്രദേശത്തും ഒഴുകിയെത്തിയ പത കാൽനടയാത്രക്കാർക്കും വാഹനങ്ങൾക്കും തടസമുണ്ടാക്കി. വേനൽ ചൂടിൽ രാസപ്രവർത്തനം സംഭവിച്ച തടാകത്തിലെ മാലിന്യങ്ങൾ​മഴയെത്തിയതതോടെയാണ്​ പതഞ്ഞുപൊങ്ങി തുടങ്ങിയത്​. മഞ്ഞുപോലെ പതഞ്ഞ്​ റോഡിലടിഞ്ഞ വിഷലിപ്​തമായ മാലിന്യങ്ങൾ വൈറ്റ്​ഫീൽഡ്​ മെയിൻ റോഡിൽ ഗതാഗത തടസമുണ്ടാക്കി. 

ശനിയാഴ്​ച നഗരത്തിൽ മഴ തിമർത്തു പെയ്​തതോടെയാണ്​ തടാകത്തിൽ നിന്നും പത ഉയർന്നു തുടങ്ങിയത്​. ഇത്​ ഞായറാഴ്​ചയും തുടർന്നു.  തടാകത്തിൽ രൂപപ്പെട്ട പെട്ടന്ന്​​ അലിയാത്ത തരം പത ശക്തമായ കാറ്റിൽ റോഡിലും സമീപദേശത്തേക്കും എത്തുകയും കൂടിക്കിടക്കുകയുമായിരുന്നു. 

സമീപപ്രദേശങ്ങളിലെ വ്യവസായശാലകളിൽ നിന്നുള്ള രാസമാലിന്യങ്ങളും  അലക്കുകമ്പനികളില്‍ നിന്നുള്ള സോപ്പുവെള്ളവും അമിതമായി അടിയുന്നതാണ്​​ തടാകം പതഞ്ഞ​ു പൊങ്ങുന്നതിലേക്ക്​ എത്തിയത്​. പത പൊങ്ങി റോഡിലും പരിസരപ്രദേശത്തുമെത്തിയത്​ നാട്ടുകാരെ ആശങ്കയി​ലാക്കി. പത​ തട്ടിയ ശരീരഭാഗത്ത്​ ചൊറിഞ്ഞ്​ തടിക്കുന്നതായ​ും മറ്റ്​  ആരോഗ്യ പ്രശ്‌നങ്ങളുണ്ടായതായും നാട്ടുകാര്‍ പറഞ്ഞു. 

വർത്തൂർ തടാകം ഇതിനു മുമ്പും പതഞ്ഞു പൊങ്ങിയിരുന്നു. അമിതമായി രാസമാലിന്യങ്ങള്‍ എത്തിയതിനെ തുടർന്ന്​ നഗരത്തിലെ പ്രധാന ജലാശയങ്ങളായ ബെല്ലന്ദൂര്‍, അര്‍ക്കാവതി തടാകങ്ങളും പതഞ്ഞു പൊങ്ങിയിരുന്നു. ചില തടാകങ്ങളില്‍ മത്സ്യങ്ങള്‍ കൂട്ടത്തോടെ ചത്തുപൊന്തുകയും ചെയ്തിരുന്നു.