വൈഗ കൊലപാതകം; പ്രതി സനു മോഹനെ ഹോട്ടൽ ജീവനക്കാർ തിരിച്ചറിഞ്ഞു

കൊച്ചി: വൈഗ കൊലപാതക കേസിൽ പ്രതിയായ പിതാവ്​ സനു മോഹനെതിരെ പുതിയ തെളിവ്​. വൈഗക്ക്​ അവസാനമായി ഭക്ഷണവും കൊ​ക്കകോളയും വാങ്ങി നൽകിയ തുറവൂരിലെ ഹോട്ടൽ ജീവനക്കാർ സനു മോഹനെ തിരിച്ചറിഞ്ഞു. ഹോട്ടലിൽ നടന്ന തെളിവെടുപ്പി​നിടെയാണ്​ ജീവനക്കാർ സനു മോഹനെ തിരിച്ചറിഞ്ഞത്​.

വൈഗയുടെ ശരീരത്തിൽ മദ്യത്തിന്‍റെ അളവ്​ പോസ്റ്റുമോർട്ടം റിപ്പോർട്ടിൽ സ്​ഥിരീകരിച്ചിരുന്നു. ആലപ്പുഴയിലെ ബന്ധുവീട്ടിൽനിന്ന്​ കങ്ങരപ്പടിയിലെ ഫ്ലാറ്റി​േലക്ക്​ വരുന്നതിനിടെ വൈഗക്ക്​ അൽഫാമും കൊ​ക്കകോളയും വാങ്ങി നൽകിയെന്ന്​ സനു മോഹൻ പൊലീസിനോട്​ പറഞ്ഞിരുന്നു. കൊ​ക്കകോളയിൽ മദ്യം കലർത്തി നൽകിയതായാണ്​ പൊലീസ്​ നിഗമനം. എന്നാൽ മദ്യം നൽകിയിട്ടില്ലെന്നാണ്​ സനു മോഹൻ പറയുന്നത്​.

'ഹോട്ടൽ ജീവനക്കാർ സനു മോഹനെ തിരിച്ചറിഞ്ഞു. അവൻ വാങ്ങിയ സാധനങ്ങൾ പോലും അവർ ഓർത്തിരിക്കുന്നുണ്ട്​. സനു മോഹൻ ശീതള പാനീയവും അൽഫാമും വാങ്ങിയകാര്യം അവർ പറഞ്ഞു. വൈഗക്ക്​ മദ്യം നൽകിയില്ലെന്ന്​ സനു മോഹൻ പറയുന്നതിനാൽ ഹോട്ടൽ ജീവനക്കാരുടെ സ്​ഥിരീകരണം ഞങ്ങളുടെ കണ്ടെത്തലുകൾക്ക്​ ബലം നൽകും' -അന്വേഷണ സംഘത്തിലെ ഒരു ഉദ്യോഗസ്​ഥൻ പറഞ്ഞു.

മഹാരാഷ്​ട്ര, തമിഴ്​നാട്​, കർണാടക എന്നിവിടങ്ങളിലെത്തിച്ച്​ തെളിവെടുത്ത സംഘം കൊല്ലൂരിലെ ഒരു ഹോട്ടലിൽനിന്ന്​ സനു മോഹൻ ഉ​പേക്ഷിച്ച ജാക്കറ്റ്​ കണ്ടെത്തിയിരുന്നു. ഹോട്ടൽ ജീവനക്കാരും അത്​ തിരിച്ചറിഞ്ഞു.

വെള്ളിയാഴ്ച പൊലീസ്​ തെളിവെടുപ്പ്​ പൂർത്തിയാക്കി. 'സനു മോഹന്‍റെ പ്രസ്​താവനയിൽ ചില വൈരുദ്ധ്യങ്ങളുണ്ട്​. കൂടുതൽ ചോദ്യം ചെയ്യാൻ രണ്ടുദിവസം മാത്രമാണ്​ ബാക്കി. കോടതിയിൽ ഹാജരാക്കുന്നതിന്​ മുമ്പ്​ സനു മോഹൻ നൽകിയ എല്ലാ പ്രസ്​താവനകളും വീണ്ടും പരിശോധിക്കും. കാറിലെ ഫോറൻസിക്​ റിപ്പോർട്ടിനായി കാത്തിരിക്കുകയാണ്​. അവസാന ​റിമാൻഡ്​ റിപ്പോർട്ട്​ അതിന്‍റെ അടിസ്​ഥാനത്തിലാകും തയാറാക്കുക' -പൊലീസ്​ പറഞ്ഞു.

സാമ്പത്തിക തട്ടിപ്പ്​ കേസിൽ സനു മോഹനെ കസ്റ്റഡിയിൽ വാങ്ങാൻ മുംബൈ പൊലീസും​ ശ്രമിച്ചിരുന്നു.