ബെഡ്ഷീറ്റിൽ ഒളിപ്പിച്ച മൂന്ന് ലക്ഷം യു.എസ് ഡോളറുമായി ഉസ്ബെക്ക് പൗരൻ പിടിയിൽ

ന്യൂഡൽഹി: ബെഡ് ഷീറ്റിൽ ഒളിപ്പിച്ച 3 ലക്ഷം യു.എസ് ഡോളറുമായി(ഏകദേശം 2.52 കോടി രൂപ) ഉസ്ബെക്കിസ്ഥാൻ പൗരനെ വെള്ളിയാഴ്ച ഡൽഹി അന്താരാഷ്ട്ര വിമാനത്താവളത്തിൽ വെച്ച് സി.ഐ.എസ്.എഫ് പിടികൂടി. എമിറേറ്റ്‌സ് വിമാനത്തിൽ ദുബായിലേക്ക് പോകുകയായിരുന്ന യാത്രക്കാരനെ പുലർച്ചെ 2.30 ഓടെ ഇന്ദിരാഗാന്ധി ഇന്റർനാഷണൽ (ഐജിഐ) വിമാനത്താവളത്തിന്റെ ടെർമിനൽ 3 ൽ സുരക്ഷാ പരിശോധനയ്ക്കിടെ തടയുകയായിരുന്നു. സംശയം തോന്നി ബാഗിൽ സൂക്ഷിച്ചിരുന്ന ബെഡ്ഷീറ്റുകൾ പരിശോധിച്ചപ്പോഴാണ് ഏകദേശം 2.52 കോടി രൂപ വിലമതിക്കുന്ന 3,07,500 ഡോളർ കണ്ടെടുത്തത്. ഡോളറുകൾ പ്ലാസ്റ്റിക് കവറുകളിൽ പൊതിഞ്ഞ് ബെഡ്ഷീറ്റിനുള്ളിൽ ഒളിപ്പിച്ച നിലയിലാണ് കണ്ടെത്തിയത്.

ഓർഗാനിക് വസ്തുക്കളാൽ നിർമ്മിച്ചതിനാൽ ലഗേജിന്റെ എക്സ്-റേ സ്ക്രീനിംഗ് സമയത്ത് ഇവ രണ്ടും തമ്മിൽ വേർതിരിച്ചറിയാൻ ബുദ്ധിമുട്ടായിരുന്നു. സബ് ഇൻസ്‌പെക്ടർ ആഷിഷ് സിങ്ങിന്റെ ജാഗ്രതയാണ് കണ്ടെത്തലിലേക്ക് നയിച്ചത്. കണ്ടെടുത്ത കറൻസിയും യാത്രക്കാരനെയും കൂടുതൽ അന്വേഷണത്തിനായി സി.ഐ.എസ്.എഫ് കസ്റ്റംസ് വകുപ്പിന് കൈമാറി.