ഉത്തരാഖണ്ഡിൽ രക്ഷാപ്രവർത്തനം നിർത്തിവെച്ചു; ഉരുൾപൊട്ടിയതായി സൂചന

ഡെറാഡൂൺ: ഉത്തരാഖണ്ഡിൽ മഞ്ഞുപാളി സ്​ഫോടനത്തെ തുടർന്ന്​ ദുരന്തത്തിൽപ്പെട്ടവരെ രക്ഷപ്പെടുത്തുന്നതിനുള്ള പ്രവർത്തനം പ്രതിരോധ സേനകൾ നിർത്തിവെച്ചു. മലമുകളിൽ ഉരുൾപൊട്ടിയതായി സൂചനകൾ പുറത്തുവന്നതോടെ തപോവൻ തുരങ്കം, റേനി ഗ്രാമം എന്നിവിടങ്ങളിലെ രക്ഷ​ാപ്രവർത്തനമാണ്​ നിർത്തിവെച്ചത്​. ഋഷി ഗംഗ നദിയിലെ ജലനിരപ്പ്​ ഉയരുന്നതിനെ തുടർന്ന്​ സമീപ​ പ്രദേശങ്ങളിലുള്ളവരെ ഒഴിപ്പിക്കാനും ശ്രമം ആരംഭിച്ചു.

പ്രദേശത്ത്​ കാലാവസ്​ഥ പ്രതികൂലമാകുകയും നദിയിലെ ജലനിരപ്പ്​ ഉയരുകയും ചെയ്​തതോടെ രക്ഷാപ്രവർത്തനത്തിൽ ഏർപ്പെട്ടിരിക്കുന്നവരോട്​ പിന്മാറാൻ നിർദേശം നൽകുകയായിരുന്നു. സൈറൻ മുഴക്കി ഗ്രാമവാസികളെ സൈന്യം ഒഴിപ്പിക്കുകയാണ്​.

ചമോലി ജില്ലയിൽ ഞായറാഴ്ച രാവി​െലയുണ്ടായ ദുരന്തത്തിൽ 200ൽ അധികം പേരെയാണ്​ കാണാതായത്​. പ്രദേശത്തെ ഒരു വൈദ്യുത നിലയവും അഞ്ച്​ പാലങ്ങളും ഒഴുകിപോയിരുന്നു. ​മറ്റൊരു വൈദ്യുതനിലയം ഭാഗികമായി തകർന്നു. 32 മൃതദേഹങ്ങളാണ്​ ഇതുവരെ കണ്ടെത്തിയത്​. 45 കിലോമീറ്ററിൽ അധികം പ്രദേശത്ത്​​ നാശനഷ്​ടമുണ്ടായി.

തപോവനിൽ നിർമാണത്തിലിരുന്ന തുരങ്കത്തിൽ ഏകദേശം 30ഓളം തൊഴിലാളികൾ കുടുങ്ങികിടക്കുന്നതായാണ്​ വിവരം. മൂന്നുദിവസമായി ഇവിടെ രക്ഷപ്രവർത്തനം തുടരുകയാണ്​. ഇംഗ്ലീഷ്​ അക്ഷരത്തിലെ യു ആകൃതയിലുള്ള ടണലിൽ ചെളി നിറഞ്ഞതിനെ തുടർന്ന്​ രക്ഷാപ്രവർത്തനം മന്ദഗതിയിലായിരുന്നു.