ഉത്തരാഖണ്ഡ്​ മന്ത്രി യശ്​പാൽ ആര്യയും മകനും എം.എൽ.എയുമായ സഞ്​ജീവ്​ ആര്യയും കോൺഗ്രസിൽ

ന്യൂഡൽഹി: ഉത്തരാഖണ്ഡ്​ മന്ത്രി യശ്​പാൽ ആര്യയും മകനും എം.എൽ.എയുമായ സഞ്​ജീവ്​ ആര്യയും കോൺഗ്രസിൽ ചേർന്നു. ബി.ജെ.പി നേതാവായ യശ്​പാൽ ആര്യ ഉത്തരാഖണ്ഡ്​ ഗതാഗത മന്ത്രിയായിരുന്നു.

ന്യൂഡൽഹിയിലെത്തി​ ഇരുവരും രാഹുൽ ഗാന്ധിയെ സന്ദർ​ശിച്ചു​. കോൺഗ്രസ്​ നേതാക്കളായ ഹരീഷ്​ റാവത്ത്​, രൺദീപ്​ സുർജേവാല, കെ.സി വേണുഗോപാൽ തുടങ്ങിയവർ ചടങ്ങിൽ സന്നിഹിതരായി. തന്‍റെ മന്ത്രി സ്ഥാനം രാജിവെക്കുന്നതായും യശ്​പാൽ ആര്യ പ്രതികരിച്ചു.

മുമ്പ്​ കോൺഗ്രസിലായിരുന്ന യശ്​പാൽ ആര്യ 2007 മുതൽ 2014വരെ ഉത്തരാഖണ്ഡ്​ പി.സി.സി പ്രസിഡന്‍റായിരുന്നു. തുടർന്ന്​ കോൺഗ്രസുമായി ഉടക്കി 2017ൽ ബി.ജെ.പിയിൽ ചേരുകയായിരുന്നു. അടുത്ത വർഷം നിയസഭ തെരഞ്ഞെടുപ്പിനൊരുങ്ങുന്ന ഉത്തരാഖണ്ഡിൽ യശ്​പാൽ ശർമയുടെ വരവ്​ കോൺഗ്രസിന്​ ഉണർവ്​ പകരുമെന്നാണ്​ രാഷ്​ട്രീയ കേന്ദ്രങ്ങളുടെ വിലയിരുത്തൽ.