ഉത്തരാഖണ്ഡ്​ മന്ത്രിയുടെ ഭാര്യക്ക്​ കോവിഡ്​; മന്ത്രി നിരീക്ഷണത്തിൽ

ഡെറാഡൂൺ: ഭാര്യക്ക്​ കോവിഡ്​ സ്​ഥിരീകരിച്ചതിനെ തുടർന്ന് ഉത്തരാഖണ്ഡിലെ വിനോദ സഞ്ചാരവകുപ്പ്​ മന്ത്രി സത്​പാൽ മഹാരാജ്​ നിരീക്ഷണത്തിൽ. മന്ത്രിയും ഭാര്യയുമായി അടുത്തിടപഴകിയ 40ഓളം പേരെയും ക്വാറൻറീനിലാക്കിയിട്ടുണ്ട്​. 

സത്​പാൽ മഹാരാജി​​െൻറ ഭാര്യ അമൃത രാവത്തിനാണ് ശനിയാഴ​്​ച​ കോവിഡ്​ സ്​ഥിരീകരിച്ചത്​. കുറച്ചുദിവസങ്ങൾക്ക്​ മുമ്പ്​ ഇവർക്ക്​ പനിയുണ്ടായിരുന്നു. ഇതേ തുടർന്ന്​ നടത്തിയ പരിശോധനയിലാണ്​ രോഗം കണ്ടെത്തിയത്​. മന്ത്രിയും ഭാര്യയും ഔദ്യോഗിക വസതിയിലായിരുന്നു താമസം. ​

ശനിയാഴ്​ച ഉത്തരാഖണ്ഡിൽ 22 പേർക്കാണ്​ പുതുതായി കോവിഡ്​ കണ്ടെത്തിയത്​. ഇതോടെ സംസ്​ഥാനത്ത്​ 749 പേർക്ക്​ രോഗം സ്​ഥിരീകരിച്ചു. പുതുതായി രോഗം സ്​ഥിരീകരിച്ച 22 ​പേരിൽ 14 എണ്ണം ഡെറാഡൂണിലും മൂന്നെണ്ണം ഹരിധ്വാറിലും അഞ്ചെണ്ണം നൈനിറ്റാളിലുമാണ്​.