യു.പിയിൽ മരണ സർട്ടിഫിക്കറ്റിൽ ‘ശോഭന ഭാവി’ ആശംസിച്ച്​​​ ഗ്രാമമുഖ്യൻ

ഉന്നാവ്​: മരിച്ചവർക്ക്​ നല്ല ഭാവി ആശംസിക്കാൻ പാടില്ലേ?. മരണ സർട്ടിഫിക്കറ്റിൽ വരെ ‘ശോഭനമായ ഭാവി’ ആശംസിക്കാമെ ന്നാണ്​ ഉത്തർ പ്രദേശിലെ ഉന്നാവ്​ ജില്ലയിലെ ഒരു ഗ്രാമമുഖ്യൻ തെളിയിക്കുന്നത്​​.

കഴിഞ്ഞ മാസം മരിച്ച വയോധികൻെറ മരണ സർട്ടിഫിക്കറ്റിലാണ്​ സിർവാരിയ ഗ്രാമ മുഖ്യൻ ശോഭനമായ ഭാവി ആശംസിച്ചിരിക്കുന്നത്​. ജനുവരി 22നാണ്​ ലക്ഷ്​മി ശങ്കർ അസുഖബാധിതനായി മരിക്കുന്നത്​. തുടർന്ന്​ സാമ്പത്തിക ക്രയ വിക്രയങ്ങൾക്ക്​ വേണ്ടി മരണ സർട്ടിഫിക്കറ്റിനായി ലക്ഷ്​മിശങ്കറിൻെറ മകൻ ഗ്രാമമുഖ്യൻ ബാബുലാലിന്​ അപേക്ഷ നൽകി.

മരണ സർട്ടിഫിക്കറ്റ്​ നൽകാൻ മാത്രമല്ല അതിൽ ആശംസ അറിയിക്കാനും ബാബുലാൽ തയാറായി. സർട്ടിഫിക്കറ്റ്​ നിമിഷങ്ങൾക്കകം സോഷ്യൽ മീഡിയയിൽ വൈറലായി. തുടർന്ന്​ ഗ്രാമമുഖ്യൻ ക്ഷമ ചോദിച്ചതായും പുതിയ മരണ സർട്ടിഫിക്കറ്റ്​ നൽകിയതായും എൻ.ഡി.ടി.വി റിപ്പോർട്ട്​ ചെയ്​തു.