ഉപഹാർ ദുരന്തം​: പ്രതികൾ നേരിട്ട്​ ഹാജരാകണമെന്ന്​ ഡൽഹി കോടതി

ന്യൂഡൽഹി: ഉപഹാർ ദുരന്ത കേസിലെ പ്രതികളോട്​ നേരിട്ട്​ ഹാജരാകണമെന്ന്​ ഡൽഹി കോടതി. കേസുമായി ബന്ധപ്പെട്ട തെളിവുകളിൽ കൃത്രിമം കാണിച്ചെന്ന ആരോപണത്തിൽ ആഗസ്​ത്​ 16,18ന്​ നടക്കുന്ന വാദത്തിന്​ നേരിട്ട്​ ഹാജരാകാനാണ്​ കോടതി ആവശ്യപ്പെട്ടിരിക്കുന്നത്​.
ആരോഗ്യപരമായ കാരണങ്ങളാൽ നേരിട്ട്​ ഹാജരാകുന്നതിൽ എന്തെങ്കിലും ഇളവ്​ ആവശ്യമുണ്ടെങ്കിൽ അപേക്ഷയോടൊപ്പം മെഡിക്കൽ റിപ്പോർട്ടുകളും ഹാജരാക്കണമെന്ന്​ കോടതി അറിയിച്ചു. 

ഉപഹാർ ദുരന്തത്തിൽ മക്കളെ നഷ്​ടപ്പെട്ട നീലം കൃഷ്​ണമൂർത്തി നൽകിയ പരാതിയുടെ അടിസ്​ഥാനത്തിൽ ​െപാലീസ് നൽകിയ കുറ്റപ്പത്രത്തെ അടിസ്​ഥാനമാക്കിയാണ്​ ഉത്തരവ്​ പുറപ്പെടുവിച്ചത്​. തെളിവുകളിൽ ​കൃത്രിമം കാണിച്ചുവെന്ന ആരോപണത്തെ ചോദ്യം ചെയ്​ത്​ പ്രതികളായ സുശീൽ അൻസാലും ഗോപാൽ അൻസാലും ഹൈകോടതിയെ സമീപിച്ചിരുന്നു. 

ഏഴു പ്രതികൾക്കെതിരെയും കുറ്റം ചെയ്യാനുള്ള പ്രേരണ, തെളിവുകൾ നശിപ്പിക്കുക, പൊതുപ്രവർത്തകരുടെ കുറ്റകരമായ വിശ്വാസ വഞ്ചന, കുറ്റകരമായ ഗൂഢാലോചന എന്നീ കുറ്റങ്ങൾ ചുമത്താൻ ജില്ലാ കോടതി നേര​െത്ത ഉത്തരവിട്ടിരുന്നു. പ്രതികൾ കുറ്റം നിഷേധിച്ചെങ്കിലും ഹരജി കോടതി തള്ളി. 
നേരത്തെ, സുപ്രീം കോടതി വിധി പ്രകാരം ഗോപാൽ അൻസാൽ തീഹാർ ജയിൽ അധികൃതർക്ക്​ മുമ്പാകെ കീഴടങ്ങിയിരുന്നു. 

1997ജൂൺ മൂന്നിന്​ ഉപഹാർ സിനിമാ തിയേറ്ററിൽ തീപിടുത്തമുണ്ടായി 59ഒാളം പേർ മരിക്കുകയും 100ലേറെ പേർക്ക്​ പരിക്കേൽക്കുകയും ചെയ്​തിരുന്നു. തിയേറ്ററിന്​ അടിയന്തിര രക്ഷാ കവാടങ്ങളോ അഗ്​നിശമന സംവിധാനങ്ങളോ ഉണ്ടായിരുന്നില്ല. ഇൗ സംവിധാനങ്ങൾ ഒരുക്കേണ്ട സ്​ഥലം കൂടി തിയേറ്ററിലേക്ക്​ ഉൾപ്പെടുത്തി കൂടുതൽ ആളുകളെ ഉൾ​െക്കാള്ളിക്കാവുന്ന തരത്തിലാക്കി എന്ന  കുറ്റത്തിനാണ്​  പ്രതികളെ സുപ്രീം കോടതി ശിക്ഷിച്ചത്​.