യു.പിയിൽ കൂട്ടബലാത്സംഗത്തിനിരയായ ദലിത്​ പെൺകുട്ടി മരിച്ചു

ന്യൂഡൽഹി: ഉത്തർപ്രദേശിലെ ഹത്രാസിൽ കൂട്ടബലാത്സംഗത്തിനിരയായ ദലിത്​ പെൺകുട്ടി മരിച്ചു. സെപ്​റ്റംബർ 14നാണ്​ ദലിത്​ സമുദായത്തിൽ നിന്നുള്ള 20കാരിയെ നാലംഗ സംഘം ബലാത്സംഗത്തിനിരയാക്കിയത്​. നാവ്​ മുറിച്ച്​ മാറ്റിയതുൾപ്പെടെയുള്ള ക്രൂരമായ അതിക്രമത്തിന്​ ഇരയായ പെൺകുട്ടി അത്യാസന്ന നിലയിലായിരുന്നു.

അലിഗഢിൽ ചികിത്സയിലായിരുന്ന പെൺകുട്ടിയെ കഴിഞ്ഞ ദിവസമാണ്​ വിദഗ്​ധ ചികിത്സക്കായി ഡൽഹിയിലെ ആശുപത്രിയിൽ പ്രവേശിപ്പിച്ചത്​. ​​ചികിത്സയിലിരി​ക്കെ ചൊവ്വാഴ്​ച പുലർച്ചെയോടെ മരണം സംഭവിക്കുകയായിരുന്നു.

സെപ്​റ്റംബർ 14ന്​ വൈകീട്ട് കുടുംബാംഗങ്ങൾക്കൊപ്പം​ പുല്ലുവെട്ടാൻ പോയ പെൺക​ുട്ടിയെ നാലംഗ സംഘം ദുപ്പട്ടകൊണ്ട്​ കഴുത്ത്​ മുറുക്കി പാടത്തിലൂടെ വലിച്ചിഴച്ച്​ കൊണ്ടുപോയി കൂട്ടബലാത്സംഗത്തിന്​ ഇരയാക്കുകയായിരുന്നു. മകളെ കാണാതായതോടെ തിരഞ്ഞുപോയ മാതാവ്​ പാടത്തിനരികിൽ അബോധാവസ്ഥയിൽ ​കിടക്കുന്ന പെൺകുട്ടിയെ കണ്ടെത്തുകയായിരുന്നു. പെൺകുട്ടിയുടെ നാവ്​ കടിച്ചു മുറിച്ചെടുത്ത നിലയിലായിരുന്നു. സുഷ്​മനാഡിക്കും പരിക്കേറ്റിരുന്നു.

സംഭവത്തിൽ നാലു പ്രതികളെയും പൊലീസ്​ അറസ്​റ്റു ചെയ്​തിട്ടുണ്ട്​. ആദ്യഘട്ടത്തിൽ പൊലീസ്​ നടപടി എടുത്തില്ലെന്ന പരാതി ഉയർന്നിരുന്നു.