ആം ആദ്​മി നേതാവിനുനേരേ മഷിയൊഴിച്ച ഹിന്ദുയുവവാഹിനിക്ക്​ സാമ്പത്തിക സഹായവുമായി വിമത കോൺഗ്രസ്​ എം.എൽ.എ

റായ്ബറേലി: ആം ആദ്​മി പാർട്ടി നേതാവ്​ സോംനാഥ്​ ഭാരതിക്കുനേരേ മഷിയൊഴിച്ച ഹിന്ദുയുവവാഹിനി പ്രവർത്തകന്​​ സാമ്പത്തിക സഹായവുമായി വിമത കോൺഗ്രസ്​ എം.എൽ.എ. ഹിന്ദു യുവവാഹിനി നേതാവ് ജിതേന്ദ്ര സിങ്​ യോഗിയെ ആദരിക്കുകയും 50,000രൂപ പാരിതോഷികമായി നൽകുകയുമായിരുന്നു. റായ്​ബറേലി മണ്ഡലത്തിൽ നിന്നുള്ള വിമത കോൺഗ്രസ് എം‌എൽ‌എ രാകേഷ് സിങാണ്​ പണം നൽകിയത്​. ഹിന്ദുക്കളുടെ അഭിമാനം കാത്തുസൂക്ഷിച്ചതിനാണ്​ സമ്മാനമെന്നും രാകേഷ് സിങ്​ പറയുന്നു.

യു.പി മുഖ്യമന്ത്രി യോഗി ആദിത്യനാഥ് സ്ഥാപിച്ച സംഘടനയാണ്​ ഹിന്ദു യുവവാഹിനി. സംഘടനയുടെ ജില്ലാ കൺവീനറാണ്​ ജിതേന്ദ്ര സിങ്​. 2017ൽ യോഗി മുഖ്യമന്ത്രിയായ ശേഷം സംഘടന പിരിച്ചുവിട്ടിരുന്നു. എന്നാൽ സംഘടനയി​ലെ അംഗങ്ങൾ ഇപ്പോഴും സജീവമാണ്​. റായ്ബറേലിയിലെ ഹർചന്ദ്‌പൂർ നിയോജകമണ്ഡലത്തിലെ എം‌എൽ‌എയാണ്​ രാകേഷ് സിങ്​. ആം ആദ്മി എം‌എൽ‌എ സോംനാഥ് ഭാരതി തിങ്കളാഴ്ച റായ്ബറേലി സന്ദർശിച്ചിരുന്നു​. ഈ സമയമാണ്​ ഹിന്ദുയുവവാഹിനി പ്രവർത്തകൻ അദ്ദേഹത്തിനുനേരേ മഷിയൊഴിച്ചത്​.

സംഭവത്തിന്‍റെ വീഡിയോ പിന്നീട്​ സോഷ്യൽ മീഡിയയിൽ വൈറലായി. മുഖ്യമന്ത്രി യോഗി ആദിത്യനാഥിനെതിരേ മോശംഭാഷ ഉപയോഗിച്ചെന്ന്​ ആരോപിച്ചായിരുന്നു മഷിയൊഴിക്കൽ. യുവ വാഹിനി നേതാവിന്‍റെ നടപടി ഹിന്ദുക്കളുടെയും റായ്ബറേലി ജനതയുടെയും അഭിമാനം സംരക്ഷിച്ചെന്നും ഭാരതിക്ക് ഉചിതമായ മറുപടി നൽകിയെന്നും രാകേഷ് സിങ് എം‌എൽ‌എ പറഞ്ഞു. അതേസമയം സംസ്ഥാനത്തെ ആശുപത്രികളുടെ അവസ്ഥയെക്കുറിച്ചുള്ള പ്രസ്താവനയിലൂടെ ത​േന്‍റയും സമൂഹത്തി​േന്‍റയും വികാരം വ്രണപ്പെടുത്തിയതിന് രാധെ സാഹു നൽകിയ പരാതിയിൽ സോംസാഥ്​ ഭാരതിക്കെതിരേഅമേത്തി പോലീസ് കേസെടുക്കുകയും അറസ്റ്റ് ചെയ്യുകയും ചെയ്​തു.

അദ്ദേഹത്തിന്‍റെ ജാമ്യാപേക്ഷ സുൽത്താൻപൂരിലെ പ്രത്യേക എംപി-എം‌എൽ‌എ കോടതി നിരസിക്കുകയും 14 ദിവസത്തെ ജുഡീഷ്യൽ കസ്റ്റഡിയിലേക്ക് അയക്കുകയും ചെയ്തിട്ടുണ്ട്​. 2022 ലെ യു.പി നിയമസഭാ തെരഞ്ഞെടുപ്പിൽ മത്സരിക്കുമെന്ന്​ ആം ആദ്മി പാർട്ടി പ്രസ്​താവിച്ചിരുന്നു.