ഹാഥറസ്​: ഉത്തർപ്രദേശ്​ കോൺഗ്രസ്​ അധ്യക്ഷൻ അജയ്​ കുമാറിനെ വീട്ടുതടങ്കലിലാക്കി പൊലീസ്​

ലഖ്​നോ: ഹാഥറസ്​ പെൺകുട്ടിയുടെ കുടുംബത്തെ സന്ദർശിക്കാൻ കോൺഗ്രസ്​ പ്രതിനിധി സംഘം എത്തുമെന്നറിയിച്ചതോടെ സംസ്ഥാന പാർട്ടി അധ്യക്ഷനെ വീട്ടുതടങ്കലിലാക്കി യു.പി പൊലീസ്​. പാർട്ടി അധ്യക്ഷൻ അജയ്​ കുമാർ ലല്ല​ുവിനെ വീട്ടുതടങ്കലിൽ ആക്കിയിരിക്കുകയാണെന്നും വീട്​ കനത്ത പൊലീസ്​ സംരക്ഷണത്തിലാണെന്നും യു.പി കോൺഗ്രസ്​ ട്വീറ്റ്​ ചെയ്​തു.

സംസ്ഥാന സർക്കാർ എന്താണ്​ ഒളിപ്പിക്കാൻ ശ്രമിക്കുന്നത്? ആരെയാണ്​ ഇവർ സംരക്ഷിക്കുന്നത്? ഉത്തർപ്രദേശിലെ സ്​ത്രീകൾ ഒട്ടും സുരക്ഷിതരല്ല. സംസ്ഥാനത്ത്​ നിയമവാഴ്​ചയില്ലെന്നും അജയ്​ കുമാർ ലല്ലു വാർത്താ ഏജൻസിയോട്​ പ്രതികരിച്ചു.

യോഗി സർക്കാർ പേടിക്കുന്നുണ്ട്​. പ്രതിഷേധം അവസാനിപ്പിക്കാൻ കോൺഗ്രസ് തയാറല്ലെന്നും യു.പി കോൺഗ്രസ്​ ട്വീറ്റ്​ ചെയ്​തു.

​കോൺഗ്രസ്​ നേതാക്കളായ രാഹുൽ ഗാന്ധിയും പ്രിയങ്ക ഗാന്ധിയും ഉൾപ്പെടെയുള്ള നേതൃസംഘം ഇന്ന്​ ഹാഥറസിലെത്തുമെന്ന്​ എ.ഐ.സി.സി ജനറൽ ​സെക്രട്ടറി കെ.സി വേണുഗോപാൽ അറിയിച്ചിരുന്നു.