ലോക്​ഡൗൺ ഇളവ്​: യോഗി ആദിത്യനാഥ്​ ഗൊരഖ്​നാഥ്​ ക്ഷേത്രത്തിൽ പ്രാർഥന നടത്തി

​ലഖ്​നോ: കേന്ദ്രസർക്കാർ അനുവദിച്ച ലോക്​ഡൗൺ ഇളവുകളുടെ ഭാഗമായി രാജ്യത്ത്​ പല സംസ്ഥാനങ്ങളിലും ക്ഷേത്രങ്ങൾ തുറന്നു. ഉത്തർപ്രദേശിൽ ഗോരഖ്​നാഥ്​ ക്ഷേത്രത്തിൽ മുഖ്യമന്ത്രി യോഗി ആദിത്യനാഥ്​ പ്രാർഥനക്കെത്തി. ലോക്​ഡൗൺ ഇളവുകൾ സ്വാതന്ത്ര്യമല്ലെന്നും കർശന നിയന്ത്രണങ്ങളോടെ മാത്രമേ ​ആരാധനാലയങ്ങളിൽ എത്താവന്നും​ യോഗി പറഞ്ഞു. സാമൂഹിക അകലം പാലിച്ച്​ മാത്രമേ ആരാധന നടത്താൻ സാധിക്കൂ​െവന്നും അദ്ദേഹം കൂട്ടിച്ചേർത്തു.

കർശന നിയന്ത്രണങ്ങളോടെയാണ്​ ഉത്തർപ്രദേശിൽ ആരാധനാലയങ്ങൾ തുറക്കുന്നത്​. സാനിറ്റൈസറും തെർമൽ സ്​കാനിങും ​ആരാധനാലയങ്ങളിൽ നിർബന്ധമാണ്​. മുഖാവരണം ധരിച്ച്​ മാത്രമേ ആരാധനക്കായി എത്താവു. ചെരിപ്പുകൾ പരമാവധി വാഹനങ്ങളിൽ തന്നെ വെക്കണം. അഞ്ച്​ പേരിൽ കൂടുതൽ ഒത്തുകൂടരുത്​ തുടങ്ങിയ വ്യവസ്ഥകളാണ്​ ഏർപ്പെടുത്തിയിരിക്കുന്നത്​. 65 വയസിന്​ മുകളിലുള്ളവർക്കും 10 വയസിന്​ താഴേയുള്ളവർക്കും ആരാധനാലയങ്ങളിൽ പ്രവേശനമില്ല.

ലോക്​ഡൗൺ ഇളവുകൾ നിലവിൽ വരുന്ന തിങ്കളാഴ്​ച രാജ്യത്ത്​ ഒമ്പതിനായിരത്തിലധികം കോവിഡ്​ കേസുകളാണ്​ സ്ഥിരീകരിച്ചത്​. ഇതോടെ കോവിഡ്​ സ്ഥിരീകരിച്ചവരുടെ എണ്ണം രണ്ടരലക്ഷം കടന്നു. ഇതുവരെ ഏഴായിരത്തിലധികം പേർ മരിച്ചിട്ടുണ്ട്​.