നാഗ്പൂരിലെ ആർ.എസ്.എസ് ആസ്ഥാനം തകർക്കുമെന്ന് ഭീഷണി; സുരക്ഷ കൂട്ടിയതായി പൊലീസ്

ന്യൂഡൽഹി: നാഗ്പൂരിലെ ആർ.എസ്.എസ് ആസ്ഥാനം തകർക്കുമെന്ന് ഭീഷണി. ബോംബ് ​ഉപയോഗിച്ച് കെട്ടിടം തകർക്കുമെന്നാണ് ഭീഷണി. ഫോൺകോളിലാണ് അജ്ഞാതന്റെ ഭീഷണി സന്ദേശം എത്തിയത്.

പൊലീസ് കൺട്രോൾ റൂമിൽ ഉച്ചക്ക് ഒരു മണിയോടെയാണ് ഭീഷണിസന്ദേശം എത്തിയതെന്ന് ഡി.സി.പി ഗോരഖ് ഭാംറ പറഞ്ഞു. ഭീഷണിയെ തുടർന്ന് ആർ.എസ്.എസ് ആസ്ഥാനത്ത് ബോംബ് സ്ക്വാഡും ഡോഗ് സ്ക്വാഡും പരിശോധന നടത്തി. സംശയാസ്പദമായി ഒന്നും കണ്ടെത്താൻ സാധിച്ചിട്ടില്ലെന്ന് പൊലീസ് അറിയിച്ചു. ഫോൺ ചെയ്തയാളെ കണ്ടെത്താനുള്ള ശ്രമം തുടരുകയാണെന്നും പൊലീസ് വ്യക്തമാക്കി.

കെട്ടിടത്തിനടുത്ത് സി.ആർ.പി.എഫിനേയും നാഗ്പൂർ പൊലീസിന്റെ അധിക അംഗങ്ങളേയും വിന്യസിച്ചിട്ടുണ്ട്. ആർ.എസ്.എസ് ആസ്ഥാനത്തിനടുത്ത് താമസിക്കുന്നവരുടെ നീക്കങ്ങൾ നിരീക്ഷിക്കുന്നുണ്ടെന്നും പൊലീസ് അറിയിച്ചു.