പീഡനക്കേസിൽ കുറ്റാരോപിതനായ ബി.ജെ.പി എം.എൽ.എയുടെ ഭാര്യ ഇരക്കെതിരെ പരാതി നൽകി

ഡെറാഡൂൺ: ലൈംഗിക പീഡനക്കേസിൽ കുറ്റാരോപിതനായ ബി.ജെ.പി എം.എൽ.എയുടെ ഭാര്യ ഇരക്കെതിരെ ബ്ലാക് മെയിൽ ആരോപിച്ച് പരാതി നൽകി. ഉത്തരാഗണ്ഡിലാണ് സംഭവം.

'തന്നെ പീഡിപ്പിച്ചെന്നാരോപിച്ച് എം.എൽ.എക്കെതിരെ ഒരു സ്ത്രീ നെഹ്രു കോളനി പൊലീസ് സ്റ്റേഷനിൽ പരാതി നൽകിയിരുന്നു'. പീഡനകേസിൽ കുറ്റാരോപിതനായ എം.എൽ.എയുടെ ഭാര്യ പരാതിക്കാരിയായ സ്ത്രീ തങ്ങളെ ബ്ലാക്ക്മെയിൽ ചെയ്യുന്നെന്ന് കാണിച്ചും കഴിഞ്ഞദിവസം പരാതിനൽകിയിരുന്നു. -ഡറക്ടർ ജനറൽ ഓഫ് പൊലീസ് അശോക് കുമാർ പറഞ്ഞു. ഇരുവരുടെയും പരാതിയിൽ ഗൗരവവും സത്യസന്ധവുമായ അന്വേഷണം നടത്തുമെന്ന് പൊലീസ് പറഞ്ഞു.

എം.എൽ.എ രണ്ടുവർഷമായി തന്നെ പീഡിപ്പിക്കുന്നുണ്ടെന്നും ഇയാളുടെയും തന്‍റെ മകളുടെയും ഡി.എൻ.എ ഒന്നാണെന്നും പീഡനത്തിരയായ സ്ത്രീ പറഞ്ഞു. തന്‍റെ ഭർത്താവിന്‍റെ ഡി.എൻ.എ മകളുടേതുമായി യോജിക്കുന്നില്ലെന്നും അവർ കൂട്ടിച്ചേർത്തു.