മുംബൈയിൽ പ്രതിദിന കേസുകൾ കുറയുന്നു; ഉദ്ദവ്​ സർക്കാറിന്‍റെ നിയന്ത്രണം ഫലം കാണുന്നു?

മുംബൈ: മഹാരാഷ്​ട്ര തലസ്​ഥാന നഗരമായ മുംബൈയിൽ കോവിഡ്​ കേസുകൾ കുറയുന്നു. ശനിയാഴ്ച 5888 കേസുകളാണ്​ നഗരത്തിൽ റിപ്പോർട്ട്​ ചെയ്​തത്​. കഴിഞ്ഞ ദിവസം 7221 കേസുകൾ ആയിരുന്നത്​ 20 ശതമാനം കുറഞ്ഞിരിക്കുകയാണ്​​. ഏപ്രിൽ നാലിന്​ 11,163 പ്രതിദിന കേസുകൾ റിപ്പോർട്ട്​ ചെയ്​തിടത്ത്​ നിന്നാണ്​ മൂന്നാഴ്​ച കൊണ്ട്​ രോഗബാധയിൽ കുറവുണ്ടായത്​.

സംസ്​ഥാനത്തെ കോവിഡ്​ കേസുകളുടെ എണ്ണത്തിലും കുറവ്​ കാണിക്കുന്നുണ്ട്​. 67, 160 കേസുകളാണ്​ മഹാരാഷ്​ട്രയിൽ റിപ്പോർട്ട്​ ചെയ്​തിരിക്കുന്നത്​.

കോവിഡിനെ പിടിച്ചുകെട്ടാൻ നിയ​ന്ത്രണങ്ങൾ കർശനമാക്കിയതിന്‍റെ വിജയമാണിതെന്നാണ്​ സൂചന. ഉദ്ദവ്​ താക്കറെ സർക്കാർ സംസ്​ഥാനത്ത്​ നടപ്പിലാക്കിയത്​ ലോക്​ഡൗണാണെന്ന്​ വിശേഷിപ്പിക്കുന്നില്ലെങ്കിലും കഴിഞ്ഞ വർഷത്തെ അടച്ചുപൂട്ടലിന്​ സമാനമായിരുന്നു കാര്യങ്ങൾ.

മുംബൈ നഗരത്തിൽ മാത്രം 120 കണ്ടെയ്​ൻമെന്‍റ്​ സോണുകളുണ്ട്​. 1200 ലധികം കെട്ടിടങ്ങളാണ്​ സീൽ ചെയ്​തിരിക്കുന്നത്​. നിരോധനാജഞയും അന്തർ ജില്ല യാത്രകൾ നിരോധിക്കുകയും ഓഫീസുകളിൽ വർക്ക്​ ​ഫ്രം ഹോം സംവിധാനം നടപ്പിലാക്കുകയും ചെയ്​തതോടെ ജനങ്ങൾ പുറത്തിറങ്ങാതെയായി.

ലോക്​ഡൗൺ ഏർപെടുത്തുന്നതിനെതിരെ ഉദ്ദവിന്​ സഖ്യകക്ഷിയായ എൻ.‌സി.‌പിയിൽ നിന്ന് സ്വന്തം പാർട്ടിയായ ശിവസേനയിൽ നിന്നും കടുത്ത എതിർപ്പുകൾ നേരിടേണ്ടി വന്നെന്ന്​ റിപ്പോർട്ടുകൾ ഉണ്ടായിരുന്നു. സ്ഥിതിഗതികൾ നിയന്ത്രിക്കുന്നതിൽ സർക്കാർ പരാജയപ്പെട്ടതായും കാര്യങ്ങൾ കൈവിട്ടുപോകാൻ അനുവദിച്ചതായും താക്കറെ സർക്കാരിനെതിരെ ബി.ജെ.പി നേതാവും മുൻ മുഖ്യമന്ത്രിയുമായ ദേവേന്ദ്ര ഫഡ്‌നാവിസ്​ വിമർശനം ഉന്നയിച്ചിരുന്നു.

ലോക്​ഡൗൺ ഏർപ്പെടുത്തുന്നതിനുപകരം ആരോഗ്യ രംഗത്തെ അടിസ്​ഥാന സൗകര്യങ്ങൾ ശക്തിപ്പെടുത്തണമെന്നും മരണനിരക്ക് തടയണമെന്നുമായിരുന്നു മഹീന്ദ്ര ഗ്രൂപ്പ് ചെയർമാൻ ആനന്ദ് മഹീന്ദ്ര ഉപദേശിച്ചത്​.

'ബ്രേക്ക്​ ദ ചെയിൻ' എന്ന്​ സർക്കാർ പേരിട്ടിരിക്കുന്ന നിയന്ത്രണങ്ങൾ മേയ്​ ഒന്നിന്​ രാവിലെ ഏഴുമണിക്കണ്​ അവസാനിക്കുന്നത്​. അവശ്യ സേവനങ്ങൾ അല്ലാത്ത ഒന്നും പ്രവർത്തിക്കുന്നില്ല. പലചരക്ക്​ കടകൾ അടക്കമുള്ള അവശ്യ സേവനങ്ങൾ വരെ രാവിലെ ഏഴുമുതൽ 11മണി വരെ പ്രവർത്തിക്കാൻ പാടുള്ളൂ.

ജിമ്മുകൾ, സ്​പാ, തിയറ്റർ, ആരാധനാലയങ്ങൾ, മാളുകൾ, മാർക്കറ്റുകൾ എന്നിവയെല്ലാം അടച്ചിട്ടിരിക്കുകയാണ്​. ഉപജീവനമാർഗ്ഗം പ്രധാനമാണ്, പക്ഷേ ജീവിതമാണ് കൂടുതൽ പ്രധാനമെന്നായിരുന്നു നിയന്ത്രണങ്ങൾ പ്രഖ്യാപിച്ച വേളയിൽ ഉദ്ദവ്​ പറഞ്ഞത്​.