ഹനുമാന്‍റെ ജന്മസ്​ഥലമെവിടെ​? അവകാശമുന്നയിച്ച്​​​ രണ്ടു സംസ്​ഥാനങ്ങൾ, മൂന്ന്​ ഇടങ്ങൾ

​ന്യൂഡൽഹി: അയോധ്യയിൽ രാമക്ഷേത്രനിർമാണ നടപടികൾ തകൃതിയായി പുരോഗമിക്കുന്നതിനിടെ ഹനുമാന്‍റെ ജന്മഭൂമി തങ്ങളുടെതെന്ന്​ അവകാശപ്പെട്ട്​ ദക്ഷിണേന്ത്യയിലെ രണ്ടു സംസ്​ഥാനങ്ങളും മൂന്ന്​ പ്രദേശങ്ങളും. ഉത്തര കർണാടകയിലെ ഹംപിക്കു സമീപം കിഷ്​കിന്ദയിലുള്ള ആഞ്​ജനേയാ​ദ്രി കുന്നുകളിലാണെന്ന്​ കർണാടക വാദിക്കു​േമ്പാൾ തിരുമലയിലെ ഏഴ്​ കുന്നുകളിലുള്ള അഞ്​ജനദ്രിയിലാണെന്ന്​ ആന്ധ്ര പറയുന്നു. രണ്ട്​ അവകാശവാദങ്ങളും പ്രാദേശികമായി ജനസമ്മതിയുള്ളതായിരിക്കെയാണ്​ മൂന്നാമത്​ ഒരു അവകാശവാദം കൂടി സജീവമായി എത്തുന്നത്​. ശിവമൊഗ്ഗയിലെ രാമചന്ദ്രപുര മഠാധിപതിയുടെതാണ്​ മൂന്നാമത്തെ അവകാശവാദം.

തിരുമല വെങ്കിടേശ്വര ക്ഷേത്രം ഉൾപെടെ നിരവധി ക്ഷേത്രങ്ങൾ ഭരിക്കുന്ന തിരുമല തിരുപ്പതി ദേവസ്​ഥാനം​ (ടി.ടി.ഡി) കഴിഞ്ഞ ഡിസംബറിൽ ഹനുമാന്‍റെ ജന്മസ്​ഥലം നിർണയിക്കാൻ പ്രത്യേക വിദഗ്​ധ സമിതിയെ വെച്ചിരുന്നു. വേദ പണ്ഡിതർ, പൗരാണിക പണ്​ഡിതർ, ഐ.എസ്​.ആർ.ഒ ശാസ്​ത്രജ്​ഞർ തുടങ്ങിയവരടങ്ങിയ എട്ടംഗ സംഘം ഏപ്രിൽ 21ന്​ റിപ്പോർട്ട്​ നൽകണമെന്നായിരുന്നു നിർദേശം. വേദങ്ങളും പുരാണങ്ങളും വിശദമായി പരിശോധിച്ച്​ സമിതി റിപ്പോർട്ട്​ തയാറാക്കുമെന്ന്​ ദേവസ്​ഥാനം എക്​സിക്യുട്ടീവ്​ ഓഫീസർ കെ.​എസ്​ ജവഹർ റെഡ്​ഡി പറഞ്ഞു. തങ്ങളുടെ വാദത്തിന്​ ശാസ്​ത്രീയമായി മാത്രമല്ല, പൗരാണിക തെളിവുകള​ുടെയും പിന്തുണയുണ്ടെന്ന്​ റെഡ്​ഡി പറയുന്നു.

എന്നാൽ, ആന്ധ്രയുടെ വാദം ശരിയല്ലെന്നും ഹംപിക്കു സമീപം കിഷ്​കിന്ദയിലുള്ള ആഞ്​ജനേയാ​ദ്രി കുന്നുകളിലാണെന്ന്​​ രാമായണത്തിൽ പരാമർശമുണ്ടെന്നും കർണാടക മന്ത്രിമാർ പ്രതികരിക്കുന്നു. കുന്നിൻമുകളിൽ ഒരു ഹനുമാൻ ക്ഷേത്രവുമുണ്ട്​. ആഞ്​ജനേയാ​ദ്രി കുന്നുകൾ തീർഥാടന കേന്ദ്രമായി വികസിപ്പിക്കുമെന്ന്​ കർണാടക കൃഷിമന്ത്രി ബി.സി പാട്ടീൽ പറഞ്ഞു. ഇതിന്‍റെ തുടർച്ചയായി കർണാടക വിനോദസഞ്ചാര വകുപ്പ്​ നടപടികൾ ആരംഭിച്ചിട്ടുമുണ്ട്​.

എന്നാൽ, ഇരു വാദങ്ങളെയും തള്ളി കർണാടകയുടെ തീര പ്രദേശമായ ഗോകർണത്തെ കുഡ്​ലെ തീരത്താണെന്ന്​ ശിവമൊഗ്ഗയിലെ രാമചന്ദ്രപുര മഠാധിപതി രാഘവേശ്വര ഭാരതിയും അവകാശപ്പെടുന്നു. രാമായണ പ്രകാരം ഗോകർണ ഹനുമാന്‍റെ ജന്മഭൂമിയും ആഞ്​ജനയേനാ​ദ്രി കർമഭൂമിയു​മാണെന്നുമാണ്​ മഠാധിപതിയുടെ പക്ഷം.