ഡൽഹി കലാപം: പൊലീസിന് നേരെ വെടിയുതിർത്ത ഷാരൂഖിനെതിരെ ആദ്യ കുറ്റപത്രം

ന്യൂഡൽഹി: ഡൽഹി കലാപത്തിനിടെ പൊലീസിന്​ നേരെ വെടിയുതിർത്ത ഷാരൂഖിനെതിരെ കുറ്റപത്രം സമർപ്പിച്ചു. കോൺസ്​റ്റബിൾ ദീപക്​ ദഹിയക്കെതിരെ വെടിയുതിർത്തുവെന്നാണ്​ ഷാരൂഖിനെതിരായ കുറ്റം. ഫെബ്രുവരിയിൽ വടക്ക്​-കിഴക്കൻ ഡൽഹിയിൽ നടത്ത പൗരത്വ പ്രതിഷേധത്തിനിടെയായിരുന്നു വെടിവെപ്പ്​. 

350 പേജുള്ള കുറ്റപത്രമാണ്​ ഡൽഹിയിലെ കാർകാർദൂമ കോടതിയിൽ സമർപ്പിച്ചത്​. ഷാരൂഖിനെ കൂടാതെ ഖലീം അഹമ്മദ്​, ഇഷ്​തിയാക്​ മാലിക്​ എന്നിവരും കേസിൽ പ്രതികളാണ്​. കേസുമായി ബന്ധപ്പെട്ട്​ മാർച്ച്​ മൂന്നിന്​ ഷാരൂഖാണ്​ ആദ്യം അറസ്​റ്റിലായത്​. മറ്റുള്ള പ്രതികൾ തുടർന്ന്​ നടന്ന അന്വേഷണത്തിൽ പിടിലാവുകയായിരുന്നു.

ഐ.പി.സി സെക്ഷൻ 147(കലാപമുണ്ടാക്കൽ), 148(മാരകായുധങ്ങളുപയോഗിച്ച്​ കലാപമുണ്ടാക്കൽ) 149( അനധികൃതമായി സംഘം ചേരൽ) തുടങ്ങിയ വകുപ്പുകളുപയോഗിച്ചാണ് ഇവർക്കെതിരെ​ കേസെടുത്തിരിക്കുന്നത്​.